पैठण : मराठवाड्यातील शेतकरी औद्योगिक वसाहतीतील उद्योगधंद्यांना दिलासा देणाऱ्या पैठण येथील नाथसागर धरणामध्ये मोठ्या प्रमाणावर पाण्याची आवक सुरू आहे. मंगळवारी (दि.29) सहा वाजता येथील धरण नियंत्रण कक्षात नोंद केल्यानुसार पाण्याची आवक १७ हजार २४७ क्युसेक सुरू असल्याने धरणातील पाणीसाठा ८८.६४ टक्के झाल्याची माहिती धरण शाखा उपअभियंता मंगेश शेलार यांनी दिले आहे.
धरणाच्या वरील भागात चांगल्या स्वरूपाचा पाऊस पडल्यामुळे वरील भागातील अनेक छोट्या मोठ्या दरण, बंधारा, नदीतून येथील नाथसागर धरणात पाण्याची आवक झपाट्याने जमा झाली असून मंगळवारी रोजी सायंकाळी सहा वाजता येथील धरणात ८९ टक्के पाणीसाठा उपलब्ध झाला. मंगळवारी रोजी पहाटेपासूनच वरील धरणातून येणाऱ्या पाण्याची आवक दिवसभर मोठ्या झपाट्याने वाढ झाली. पाण्याची आवक याच पद्धतीने सुरू राहिल्यास पाणी विसर्ग करण्याच्या नियमानुसार पाटबंधारे विभागाच्या पथकाने गोदावरी नदीत पाण्याचा विसर्ग सोडण्यासाठी नियोजन करून ठेवले अशी माहिती पाटबंधारे विभागाचे कार्यकारी अभियंता प्रशांत संत यांनी दिले.
दरम्यान, पैठण येथील नाथसागर धरणामध्ये मोठ्या प्रमाणावर पाणी उपलब्ध होत असल्याने धरण पाहणाऱ्या पर्यटकांची गर्दी होऊ नये यासाठी पोलीस विभागाच्या वतीने सुरक्षा दृष्टिकोनातून धरणावर मोठ्या प्रमाणावर पोलीस बंदोबस्त तैनात ठेवला जाणार असल्याची माहिती पोलीस निरीक्षक महादेव गोमारे यांनी दिले आहे.