छत्रपती संभाजीनगर : शहरातील उल्का नगरी भागात बिबट्या आल्याची अफवा सोमवारी सकाळपासून पसरली होती. त्यामुळे नागरिकांमध्ये भीतीचे वातावरण निर्माण झाले होते. वन विभागाने प्रत्यक्ष घटनास्थळाची पाहणी करून कुठल्याही पाऊलखुणा नसल्याचे स्पष्ट केले. नागरिकांनी कुठल्याही अफवांना बळी न पडता शांतता राखण्याचे आवाहन केले आहे.
आज सकाळी सोशल मीडियावर बिबट्याचे फोटो व्हायरल झाले होते. सदर परिसर शहरातील असल्याचे नागरिकांना वाटल्याने काही वेळातच अफवा पसरून नागरिकांमध्ये भीती पसरली होती. मुख्य वन संरक्षक दादासाहेब तौर यांनी सदर घटनेचा स्पष्ट नकार दिला असून शहराच्या कोणत्याही भागात बिबट्या आढळून आला नसल्याची माहिती दिली. त्यामुळे नागरिकांनी शांतता राखून आपली कामे सुरळीत चालू ठेवावीत असे आवाहन केले आहे.