Disabled people protest in front of the Municipal Corporation
छत्रपती संभाजीनगर, पुढारी वृत्त-सेवा : गेल्या १४ महिन्यांपासून महापालिकेकडून मिळणारा निर्वाह भत्ता थकला असल्याने बुधवारी (दि.११) शहरातील संतप्त दिव्यांग बांधवांनी मनपा मुख्यालयाच्या प्रवेशद्वारावर ठिय्या आंदोलन केले.
दुपारी दीड वाजेच्या सुमारास सुरू झालेल्या या आंदोलनामुळे काही वेळ महापालिकेच्या कामकाजावर परिणाम झाला. अखेर उपमहापौर राजेंद्र जंजाळ यांनी प्रशासनाशी भ्रमणध्वनीवरून संपर्क साधून भत्ता लवकरच देण्याचे आश्वासन दिल्यानंतर हे आंदोलन मागे घेण्यात आले.
शहरातील दिव्यांग बांधवांना महापालिकेकडून निर्वाह भत्ता दिला जातो. मात्र मागील १४ महिन्यांपासून हा भत्ता मिळालेला नसल्याची तक्रार दिव्यांग नागरिकांनी केली आहे. यासंदर्भात विविध दिव्यांग संघटनांनी वेळोवेळी प्रशासनाकडे पाठपुरावा केला होता; परंतु प्रत्येक वेळी केवळ आश्वासनेच देण्यात आली. प्रत्यक्षात भत्ता न मिळाल्याने दिव्यांगांमध्ये मोठी नाराजी होती. दरम्यान, एमआयएमच्या दिव्यांग सेलतर्फे मनपा प्रशासनाला आंदोलनाचा इशारा देण्यात आला होता.
यावेळी मोहसीन खान, अब्द-ल्ला शेख, रहीम खान, सईद खान यांच्यासह अनेक कार्यकर्ते, महिला आणि दिव्यांग नागरिक मोठ्या संख्येने उपस्थित होते.