छत्रपती संभाजीनगर , पुढारी वृत्तसेवा: शहरातील बायजीपुरा परिसरात शनिवारी (दि.19) सकाळी दुहेरी हत्येची खळबळजनक घटना उघडकीस आली आहे. सलमान खान आरेफ खान (वय ३०) आणि त्याचा साला सुलतान शेख (वय १७) अशी मृतांची नावे आहेत. दुचाकीच्या वादातून दगडाने ठेचून त्या दोघांचा निर्घृण खून केल्याचा संशय जिंशी पोलिसांना व्यक्त केला आहे. पोलिसांनी मारेकऱ्यांचा शोध घेत आहेत. (Chhatrapati Sambhajinagar Murder Case)
इम्रान खान आरेफ खान (२१) यांनी दिलेल्या माहितीनुसार, सकाळी ७ वाजेच्या सुमारास त्याचा भाऊ सलमान व सुलतान यांच्यावर गल्लीत हल्ला झाला. यात सलमान जागीच ठार झाला. तर सुलतान उपचारासाठी घाटी रुग्णालयात नेत असताना मृत्यू पावल्याची माहिती मिळाली. इम्रान आणि त्याची पत्नी घटनास्थळी पोहोचले असता पोलिसांनी मृतदेहाची ओळख पटविण्यास सांगितले. तेव्हा त्यांनी मृत व्यक्ती हा त्यांचा सख्खा भाऊ सलमान असल्याचे सांगितले.
घटनास्थळी मृतदेहाजवळ मोठ्या प्रमाणात रक्त सांडलेले होते. सलमानचा चेहरा ठेचलेला असल्याचे आढळले. सुलतानवरही गंभीर हल्ला करण्यात आला होता.