वैजापूर : महाराष्ट्राचा ड्रीम प्रोजेक्ट मार्ग म्हणून ओळखल्या जाणाऱ्या समृद्धी महामार्गावर अपघातांचं सत्र सुरूच आहे. आज सोमवारी समृद्धी महामार्गावरून भरधाव वेगात जाणाऱ्या कारचा अचानक टायर फुटला. त्यानंतर कार अनियंत्रित होऊन उलटली. या भीषण अपघातात एक महिला ठार झाली तर पाच जण जखमी झाले.
अपघाताची माहिती मिळताच, स्थानिक नागरिकांसह आसरा फाउंडेशनच्या सेवकांनी धाव घेत बचावकार्य सुरू केले. अपघातातील काही जखमींना तातडीने उपचारासाठी वैजापूर उपजिल्हा रुग्णालयात तर काहींना छत्रपती संभाजीनगर येथील रुग्णालयात उपचारासाठी दाखल करण्यात आले.
मिळालेल्या माहितीनुसार, सोमवारी (१६) सायंकाळी सात वाजेच्या सुमारास अपघातग्रस्त कार ही संभाजीनगर वरून शिर्डीच्या दिशेने जात होती. कार वैजापूर जवळील चॅनल नंबर ४८० जवळ आली असता टायर गरम होऊन अचानक फुटला. त्यानंतर चालकाचे कारवरील नियंत्रण सुटले आणि कार थेट रस्त्याच्या कडेला जाऊन उलटली. या अपघातात कारमधील एका महिलेचा जागेवरच मृत्यू झाला तर पाच जण जखमी असल्याची माहिती आहे.
अपघाताची माहिती मिळताच, स्थानिक नागरिकांसह डॉक्टरांची टीम व असरा फाउंडेशन घटनास्थळी धाव घेतली. जखमींना तातडीने उपचारासाठी रुग्णालयात दाखल करण्यात आले. हे सर्व प्रवासी मुंबईतील असल्याची प्राथमिक माहिती आहे.