200 tourists injured in bee attack at Ajanta caves
सागर भुजबळ
फर्दापूर :
जगप्रसिद्ध अजिंठा लेणी परिसरात शनिवारी (दि.७) पुन्हा एकदा मोहळाने दोन वेळा पर्यटकांवर हल्ला चढविला. या हल्ल्यानंतर परिसरात एकच धावपळ उडाली. चा हल्ल्यांमध्ये जवळपास दोनशे पर्यटक जखमी झाले आहेत.
प्राप्त माहितीनुसार, पहिला हल्ला लेणी क्रमांक १० जवळ दुपारी ३:३० वाजेच्या सुमारास झाला. अचानक मधमाशांनी पर्यटकांवर हल्ला केला. या घबराटीमुळे अनेक पर्यटकांनी लेणी परिसरातून पळ काढून सप्नकुंड धबधवा परिसराकडे धाव घेतली. मात्र, तिथेही दुर्दैव टळले नाही. दुपारी साडेचारच्या सुमारास सप्तकुंड धबधबा परिसरात तेथे असलेल्या मोहळातील मधमाशांनी पर्यटकांवर हल्ला चढविला. या हल्ल्यातही काही पर्यटक जखमी झाल्याचे स्पष्ट झाले आहे.
शनिवारी विकेंडसह बकरी ईदची सुट्टी असल्याने सकाळपासूनच अजिंठा लेणीत पर्यटकांची मोठी गर्दी झाली होती. सकाळच्या सत्रात लेणीतल सर्व दैनंदिन व्यवहार शांततेत पार पडत असतानाच दुपारी लेणी क्रमांक १० च्या परिसरात मधमाशांनी अचानक चवताळून पर्यटकांवर झडप घातली. अचानक झालेल्या हल्ल्यामुळे घाबरलेले पर्यटक सैरावैरा धावू लागले. सुमारे अर्धा तास मध माश्यांचा हा तांडव सुरू राहिला त्यानंतर अनेक पर्यटकांनी अजिंठा लेणीतून सप्तकुंड धबधबा परिसराकडे धाव घेतली त्यामुळे सप्तकुंड धबधबा परिसरात पर्यटकांची गर्दी झाली. त्यातच दुपारी ४:३० वाजेच्या सुमारास सप्तकुंड धबधबा परिसरात अन्य एका आग्या मोहळाने पर्यटकांवर हल्ला चढविल्याने या ठिकाणी ही अनेक पर्यटक जखमी झाल्याचे दिसून आले. अशा प्रकारच्या घटना वारंवार घडत असल्याने अजिंठा लेणी प्रशासनावर पर्यटकांच्या सुरक्षेबाबत गंभीर प्रश्न उपस्थित होत आहेत. तातडीने योग्य उपाययोजना न झाल्यास भविष्यात गंभीर परिणाम भोगावे लागण्याची शक्यता वर्तवली जात आहे.
अजिंठा लेणीत गेल्या दोन ते तीन महिन्यांत पर्यटकांवर मधमाशांनी हल्ला केल्याच्या घटना घडल्या आहेत. यात स्थानिक, विदेशी पर्यटक, तसेच विद्यार्थ्यांच्या सहलीवरही हल्ला आणि आजचा हल्ला असे चार हल्ले झाले आहेत. मधमाशांच्या हल्ल्यापासून पर्यटकांना वाचवण्यासाठी पुरातत्त्व विभागाने कोणतीच उपाययोजना केली नसल्याने पर्यटकांत नार-ाजी पसरली आहे. दरम्यान मधमाशांकडून पर्यटकांवर वारंवार हल्ले होत असल्याने अजिंठा लेणीत येणाऱ्या पर्यटकांची संख्याही मोठ्या प्रमाणात रोडावली आहे. यानंतर पुरातत्त्व विभाग झोपेतून जागे होत नाही. या बेफिकिरीमुळे पर्यटकांनी संताप व्यक्त केला आहे. या संबंधी पुरातत्त्व विभागाचे अधीक्षक शिवकुमार भगत यांच्याशी संपर्क साधला असता त्यांनी प्रतिसाद दिला नाही.
अजिंठा लेणी परिसरात लेणी क्रमांक ९ जवळ दोन, लेणी क्र. १० जवळ सहा, तर लेणी क्र. २६ आणि ४ जवळ प्रत्येकी एक असे एकूण १० ठिकाणी मधमाशांचे पोळ सध्या अस्तित्वात आहेत. मार्च महिन्यापासून या पोळ्यांतून मधमाशांनी वारंवार पर्यटकांवर हल्ले करण्याचे सत्र सुरू केले असून, गेल्या तीन महिन्यांत अनेक पर्यटक जखमी झाले आहेत