Uncle and two brothers killed on the spot in tempo collision
बीड, पुढारी वृत्तसेवा : बीड-शिरूर कासार रस्त्यावरील हिवरसिंगा शिवारात मंगळवारी मध्यरात्री एक वाजण्याच्या सुमारास टेम्पो आणि दुचाकीचा भीषण अपघात झाला. भरधाव टेम्पोने दुचाकीला दिलेल्या जोराच्या धडकेत दोन सख्ख्या भावांसह त्यांच्या मामाचा जागीच दुर्दैवी मृत्यू झाला.
राम शेळके (वय 25, रा. शिरूर -मामा), मंगेश रोहिदास बजगुडे (वय 16) आणि गणेश रोहिदास बजगुडे (वय 20/21, दोघे रा. बालेपीर, बीड-भाचे) अशी मृतांची नावे आहेत. हे तिघे दुचाकीवरून शिरूर कासार येथून बीडकडे जात असताना, बीडकडून येणाऱ्या भरधाव टेम्पोने (क्र. एमएच 23 एमव्ही 6023) त्यांना जोराची धडक दिली.
धडक एवढी भीषण होती की तिघेही टेम्पोच्या चाकाखाली चिरडले जाऊन जागीच ठार झाले, तर धडकेनंतर टेम्पो रस्त्याखालील खड्यात जाऊन कोसळला. घटनेची माहिती मिळताच शिरूर कासार पोलिसांनी घटनास्थळी धाव घेऊन पंचनामा केला व तिन्ही मृतदेह बीड जिल्हा रुग्णालयात हलवले. बुधवारी सकाळी उत्तरीय तपासणीनंतर मृतदेह नातेवाईकांच्या स्वाधीन करण्यात आले. या घटनेमुळे बालेपीर व शिरूर परिसरात हळहळ व्यक्त केली जात आहे.