Beed Murder Case
कडा : सोशल मीडियावर एकमेकांच्या विरोधात स्टेटस आणि स्टोरी टाकण्याच्या किरकोळ कारणावरून सुरू झालेला वाद भीषण हाणामारीत बदलल्याची धक्कादायक घटना रुईनालकोल (ता. आष्टी) येथे सोमवारी रात्री घडली. या घटनेत २० वर्षीय तरुणाचा धारदार शस्त्राने वार करून खून करण्यात आला असून त्याचे दोन मित्र गंभीर जखमी झाले आहेत.
रुईनालकोल येथील जिल्हा परिषद शाळेसमोर सोमवारी रात्री तरुणांचे दोन गट आमनेसामने आले. इंस्टाग्राम आणि व्हॉट्सअॅपवर एकमेकांच्या विरोधात टाकलेल्या स्टोरीवरून गेल्या काही दिवसांपासून दोन्ही गटांत धुसफूस सुरू होती. सोशल मीडियावरील हा वाद अखेर प्रत्यक्षात भिडला आणि त्याचे रूपांतर रक्तरंजित हाणामारीत झाले. रागाच्या भरात एका गटातील तरुणांनी धारदार शस्त्राने दुसऱ्या गटातील तिघांवर सपासप वार केले. या अचानक झालेल्या हल्ल्यामुळे परिसरात एकच खळबळ उडाली.
या हल्ल्यात दीपक शिवाजी नालकोल (वय २०, रा. रुईनालकोल) हा तरुण गंभीर जखमी झाला होता. त्याला उपचारासाठी रुग्णालयात नेत असताना वाटेतच त्याचा मृत्यू झाला. तर, त्याच्यासोबत असलेले अन्य दोन तरुणही गंभीर जखमी झाले असून त्यांच्यावर अहिल्यानगर येथील खासगी रुग्णालयात उपचार सुरू आहेत. डॉक्टरांनी दोघांचीही प्रकृती अत्यंत चिंताजनक असल्याचे सांगितले आहे.
घटनेची माहिती मिळताच आष्टीचे सहाय्यक पोलीस निरीक्षक विजय नरवाडे, विक्रांत हिंगे, पोलीस उपनिरीक्षक कृष्णा नरवाडे व त्यांच्या पथकाने तात्काळ घटनास्थळी धाव घेतली. गावात सध्या तणावाचे वातावरण असून कोणताही अनुचित प्रकार घडू नये यासाठी पोलिसांनी चोख बंदोबस्त तैनात केला आहे. या प्रकरणी गुन्हा दाखल करण्याची प्रक्रिया सुरू असून हल्लेखोरांचा शोध घेण्यासाठी पोलिसांकडून विशेष पथक नेमण्यात आले आहे. सोशल मीडियावरील किरकोळ वादातून घडलेल्या या रक्तरंजित घटनेमुळे संपूर्ण परिसरात भीतीचे वातावरण पसरले आहे.