बीड : मस्साजोग येथील सरपंच संतोष देशमुख यांच्या हत्याप्रकरणाशी संबंधित असलेले फरार आरोपी आता 'सीआयडी'च्या रडारवर आहेत. या आरोपींसह त्यांच्या नातेवाईकांची १३ बँकांमधील १०० पेक्षा अधिक बँक खाती गोठवण्यात येणार असून याबाबत 'सीआयडी'च्या पथकाने कोर्टाची परवानगी मागितली आहे. आदेश मिळताच ही खाती गोठविण्यात येणार आहेत.
संतोष देशमुख यांच्या हत्या प्रकरणातील चार आरोपी अटकेत असून उर्वरित खंडणी प्रकरणातील संशयितासह आणखी काही फरार असून त्यांचा पोलिसांकडून शोध सुरू आहे. यादरम्यान मुख्यमंत्र्यांनी या प्रकरणातील आरोपींची संपत्ती जप्त करण्याचे आदेश दिल्याने आता सीआयडीच्या पथकाने त्या दिशेने पावले उचलली आहेत. आज (सोमवारी) या पथकाने या प्रकरणाशी संबंधित आरोपींसह त्यांच्या नातेवाईकांची आधार लिंक असलेली सर्व बँक खाती सीज करण्याचे पत्र बँकांना दिले. अशा १३ बँका असून त्यांच्याकडे असलेले १०० पेक्षा जास्त खाते आता सीज करण्यात आली आहेत. या खात्यांमध्ये नेमकी किती रक्कम आहे, याची माहिती याची पथकाकडून माहिती घेण्याचे काम सुरू असून सीआयडीच्या पथकाने आज दिवसभरात 25 जणांची साक्ष आहे. आतापर्यंत दीडशे जणांची चौकशी करण्यात आली आहे. आणखी बऱ्याच जणांची चौकशी होणार असल्याचे संकेत देखील मिळत आहेत.
हत्येची घटना घडल्यानंतर आरोपींचे मोबाईल गाडीमध्ये मिळून आली होते. त्याचा फॉरेन्सिक डेटा येण्यासाठी पाच दिवस लागणार आहे. हा डेटा मिळाल्यानंतर आणखी काही खुलासे होतील. एकंदरीतच संतोषी देशमुख यांच्या खून प्रकरणातील फरार आरोपींच्या अटकेसाठी आता सीआयडीने ठोस पावले उचलल्याचे दिसत आहे.