Gevrai motorcycle head-on collision
गेवराई : दुचाकीच्या समोरासमोर झालेल्या आपघातात दोन्ही दुचाकीस्वार ठार झाले. ही घटना गेवराई-माजलगाव राज्य रस्त्यावरील तलवाड्यातील राजुरा मळा येथे आज (दि.३०) दुपारी अडीचच्या सुमारास घडली. बाळू आत्माराम शिंदे (वय ३५, रा. राजुरी मळा) व नवनाथ उत्तम राठोड (वय ३६, रा. देवी तांडा, ता. गेवराई) असे या आपघातातील मृतांची नावे आहेत.
याबाबत अधिक माहिती अशी की, गेवराई-माजलगाव राज्य रस्त्यावरून दुचाकीवरुन तलवाड्याकडे बाळू शिंदे जात असताना समोरून येत असलेल्या नवनाथ राठोड याच्या दुचाकीला समोरासमोर आपघात झाला. यात बाळू शिंदे याचा जागीच मृत्यू झाला. तर नवनाथ राठोड याला उपचारार्थ गेवराईला नेत असताना वाटेतच मृत्यू झाल्याची माहिती पोलिसांनी दिली.
दरम्यान, या आपघाताची माहिती मिळताच तलवाडा पोलीस ठाण्याचे सहायक पोलीस निरीक्षक मनोज निलंगेकर, जमादार नारायण काकडे, बीट जमादार मोहसीन शेख यांनी घटनास्थळी धाव घेतली. पंचनामा करून मृत बाळू शिंदे याचा मृतदेह तलवाड्यातील प्राथमिक आरोग्य केंद्रात उत्तरीय तपासणीस नेण्यात आला.