गेवराई, पुढारी वृत्तसेवा : भरधाव वेगातील बसने दुचाकीला धडक दिल्याने गेवराई तालुक्यातील जिल्हा परिषद प्राथमिक शाळेच्या शिक्षकाचा मृत्यू झाल्याची घटना रविवार रोजी सकाळी आठ वाजेच्या सुमारास गेवराई- शेवगाव राज्य रस्त्यावर घडली. फय्याज खान (४५, रा. महारटाकळी ता. गेवराई) असे या अपघातात मृत झालेल्या शिक्षकाचे नाव आहे.
गेवराई तालुक्यातील अर्धपिंपरी येथील जिल्हा परिषद प्राथमिक शाळेत ते कार्यरत होते. रविवारी सकाळी क्रिकेट खेळून घराकडे दुचाकीवरुन जात असताना समोरील भरधाव वेगातील बसने त्यांच्या दुचाकीला धडक दिल्याने फय्याज खान यांचा जागीच मृत्यू झाला.
सदरील घटना गेवराई-शेवगाव राज्य रस्त्यावरील महारटाकळी शिवारात सकाळी आठ वाजेच्या सुमारास घडली. अपघाताची माहीती मिळताच चकलांबा पोलिस घटनास्थळावर दाखल होऊन मृत फय्याज खान यांचा मृतदेह चकलांबा प्राथमिक आरोग्य शवविच्छेदन करण्यासाठी दाखल करण्यात आला. झालेल्या दुर्घटनेमुळे महारटाकळी गावात हळहळ व्यक्त होत आहे.