केज :- जुन्या भांडणाच्या केस वरून केज तालुक्यात दोन गटात तुंबळ हाणामारी झाली असून महिलेवर तलवार आणि कोयत्याने हल्ला केला. तिच्यावर वार केल्याने भांडणात जखमी महिलेची प्रकृती गंभीर असून तिला अंबाजोगाई येथे उपचार सुरू आहेत.
दि. ३ जुलै रोजी सकाळी केज तालुक्यातील डोका येथे सुनील भारत भांगे हे त्यांची म्हैस घराच्या समोर बांधीत असताना त्यांची मुलगी राजश्री यांना, काहीजण हातात तलवार, कोयता, लोखंडी पाईप आणि दगड घेऊन आपल्या घराकडे येत असल्रूाचे दिसले. ती असे म्हणताच सुनील भांगे हे घरी गेले असता; विक्रम भागवत भांगे, सागर विक्रम भांगे आणि विशाल विक्रम भांगे हे कोयते व तलवार घेवुन त्यांना म्हणाले की, तुम्ही जुनी दाखल केलेली केस मागे का घेतली नाही? पुन्हा दोन दिवस अगोदर आमचेवर का केस केली? असे म्हणुन सुनीलची पत्नी बबीता भांगे हिला विक्रम भांगे याने तिला तलवारीने घाव घातला. यात बबिता हिच्या दोन्ही खांद्याला गंभीर दुखापत झाली. यामुळे ती खाली पडली. तसेच सागर भांगे याने पण कोयत्याने बबीताच्या डोक्यात घाव घालून ठार मारण्याचा प्रयत्न केला.
त्या नंतर सुनीलचे वडील भरत भागवत भांगे हे धावुन आले असता त्यांच्यावर पण विशाल विक्रम भांगे याने डोक्यात व उजवे हाताचे मनगटावर कोयत्याने घाव घातला. हे पाहून मुलगी राजश्री ही आरडा ओरड करत असताना तीला शारदा सागर भांगे व सुरेखा विक्रम भांगे यांनी लोखंडी पाईपने पायावर आणि हातावर मारहाण केली. तसेच सुनीलचे सासरे मधुकर संभाजी मुंडे यांना विशाल विक्रम भांगे याने कोयत्याने डोक्यात घाव घातला आणि सुनील भांगे यांना लोखंडी पाईपने मारहाण केली. या भांडणात महिलेसह चौघे जखमी झाले आहेत. या भांडणात गंभीर जखमी झालेल्या बबिता भांगे हिच्यासह चौघांवर अंबाजोगाई येथील स्वामी रामानंद वैद्यकीय महाविद्यालय व ग्रामीण रुग्णालयात उपचार सुरू असून महिलेची प्रकृती गंभीर आहे. प्रभारी पोलिस अधिकारी पोलीस निरीक्षक स्वप्नील उनवणे यांच्या मार्गदर्शनाखाली पोलिस उपनिरीक्षक राकेश बनसोडे हे तपास करीत आहेत.