कोल्हापूर : कोल्हापूर-दिल्ली मार्गावर विमानसेवा सुरू करण्यासाठी लवकरच चाचणी घेतली जाणार आहे. दिल्लीत बुधवारी झालेल्या बैठकीत ही माहिती देण्यात आली. आंतरराष्ट्रीय विमानसेवा सुरू होण्यासाठी कोल्हापूर विमानतळाची धावपट्टी तीन हजार मीटरपर्यंत वाढवा, असे आदेश केंद्रीय नागरी विमान वाहतूक राज्यमंत्री मुरलीधर मोहोळ यांनी या बैठकीत दिले.
कोल्हापूर विमानतळाच्या विविध विकासकामांबाबत तसेच प्रलंबित प्रश्नांबाबत खासदार धनंजय महाडिक यांच्या प्रमुख उपस्थितीत बैठक झाली. खा. महाडिक यांनी विमानतळ धावपट्टीचा 2300 मीटरचा टप्पा तातडीने पूर्ण करावा, त्यानंतर ती 3 हजार मीटरपर्यंत विस्तारीत करावी, अशी मागणी केली. कोल्हापूर-मुंबई आणि कोल्हापूर-दिल्ली या मार्गावर नियमित व योग्य वेळेत विमानसेवा सुरू करा, विमानतळाचा श्रेणीत सुधारणा करा. श्रेणी पाचमधून श्रेणी सहामध्ये समावेश करा, आदी मागण्या केल्या.
कोल्हापुरातून दिल्लीसाठी थेट विमानसेवा सुरू करता येईल, त्यासाठी सध्या अस्तित्वात असलेल्या पायाभूत सुविधा अधिक विकसित कराव्यात, विमानतळावर आवश्यक मनुष्यबळ उपलब्ध करावे, याकडे खा. महाडिक यांनी लक्ष वेधले. त्याला विमानतळ प्राधिकरणाच्या अधिकार्यांनी अनुकूलता दर्शवत लवकरच चाचणी घेतली जाईल, असे सांगितले.
जिल्हाधिकारी अमोल येडगे म्हणाले, विमानतळावर 1930 मीटरची धावपट्टी आहे. पहिल्या टप्प्यात ही धावपट्टी 2300 मीटर होणे गरजेचे आहे. पण, त्यासाठी विमानतळ परिसरातील एका रस्त्याला पर्यायी रस्ता देण्याबाबत आवश्यक कार्यवाही सुरू असल्याचे त्यांनी सांगितले. कोल्हापूर विमानतळावरून आंतरराष्ट्रीय विमानसेवा सुरू करण्यासाठी धावपट्टी 3 हजार मीटरपर्यंत न्यावी, अशी सूचना मंत्री मोहोळ यांनी केली.या बैठकीला विमानतळ प्राधिकरणाचे संयुक्त महासंचालक सूरज मल, सदस्य एम. सुरेश, कार्यकारी संचालक सुजय डे, ए. एस. महेशा, कोल्हापूर विमानतळाचे संचालक अनिल शिंदे यांच्यासह वरिष्ठ अधिकारी उपस्थित होते.