राधानगरी : नंदू गुरव
राधानगरी धरणाच्या पाणलोट क्षेत्रात कोसळत असलेल्या दमदार पावसामुळे राधानगरी धरण 94 टक्के भरले आहे. धरण 347.50 फूट पाणी पातळी झाल्यानंतर पूर्ण क्षमतेने भरते. पावसाचा जोर कायम राहिल्यास आज धरण पूर्ण क्षमतेने भरण्याची शक्यता आहे. कोणत्याही क्षणी धरणाचे स्वयंचालित दरवाजे खुले होण्याची शक्यता आहे. सध्याची पुरस्थिती पाहता नंदिकाठच्या नागरिकांनी सतर्क राहण्याच्या सूचना प्रशासनाच्या वतीने देण्यात आल्या आहेत.
मंगळवारी सकाळी संपलेल्या चोवीस तासात 120 मिमी तर दुपारी चार वाजता संपलेल्या दहा तासात 58 मिमी पावसाची नोंद झाली आहे. जुनपासून आज अखेर 2733 मिमी पाऊस झाला आहे. धरणाची पाणी पातळी 344.62 फूट असून पाणीसाठा - 7817.55 द.ल.घ.फु झाला आहे.
धरणातून विद्युतगृहासाठी 1500 क्यूसेक पाण्याचा विसर्ग सुरू आहे. भोगावती नदीचे पाणी पात्राबाहेर पडले आहे. पावसाचा जोर असाच कायम राहिल्यास आज धरण पूर्ण क्षमतेने भरण्याची शक्यता आहे.