कोल्हापूर : पश्चिम महाराष्ट्रातील हजारो पर्यटनप्रेमींना दरवर्षी आतुरतेने प्रतीक्षा असलेल्या दैनिक ‘पुढारी’ आयोजित आणि ‘गगन टूर्स’ प्रस्तुत ‘टूर्स अँड ट्रॅव्हल्स एक्झिबिशन 2025’ला शनिवारपासून (दि. 2) कोल्हापुरात सुरुवात होत आहे. पर्यटनाच्या नव्या हंगामाची जय्यत तयारी करण्यासाठी आणि देश-विदेशातील सहलींचे नियोजन एकाच छताखाली करण्यासाठी हे प्रदर्शन एक सुवर्णसंधी ठरणार आहे. बेळगावमध्ये मिळालेल्या अभूतपूर्व यशानंतर आता कोल्हापुरात आणि नंतर सांगलीतील पर्यटनप्रेमींसाठी हा महासोहळा आयोजित करण्यात येणार आहे.
या भव्य प्रदर्शनाचे उद्घाटन राज्याचे वैद्यकीय शिक्षणमंत्री हसन मुश्रीफ यांच्या हस्ते होणार आहे. कार्यक्रमाला प्रमुख पाहुणे म्हणून ‘गगन टूर्स’च्या संचालिका नंदिनी खुपेरकर, मार्केटिंग हेड योगेश सोनटक्के, तसेच ‘अ हेवन हॉलिडेज’चे संचालक राज बुगडे, संचालिका वर्षा बुगडे आणि सहसंचालिका प्रणिता बुगडे उपस्थित राहणार आहेत. हे प्रदर्शन म्हणजे केवळ एक इव्हेंट नसून, पर्यटनाच्या दुनियेतील एक महाउत्सव आहे, जिथे ग्राहकांना माहिती आणि संधींचा खजिना उपलब्ध होणार आहे.
हे प्रदर्शन पर्यटकांना आपल्या स्वप्नातील सुट्टीचे अचूक नियोजन करण्यासाठी परिपूर्ण व्यासपीठ उपलब्ध करून देते. तज्ज्ञांशी थेट संवाद साधून आपल्या आवडीनुसार आणि बजेटनुसार सहल ‘कस्टमाईझ’ करून घेण्याची सोय, हे या प्रदर्शनाचे मुख्य वैशिष्ट्य आहे.
विविध पर्यटनस्थळे : हिमाचलच्या बर्फाळ डोंगररांगांपासून ते केरळच्या शांत बॅकवॉटर्सपर्यंत आणि युरोपच्या ऐतिहासिक शहरांपासून ते दुबईच्या आधुनिक वैभवापर्यंतचे असंख्य पर्याय येथे उपलब्ध असतील. सर्व प्रकारच्या सहली : कौटुंबिक सहली, हनिमून पॅकेजेस, साहसी पर्यटन, बजेट टूर्स आणि ज्येष्ठ नागरिकांसाठी विशेष यात्रांची सविस्तर माहिती एकाच ठिकाणी मिळेल.
आकर्षक ऑफर्स आणि सवलती : केवळ प्रदर्शनासाठी असलेल्या खास ऑफर्स आणि सवलतींचा लाभ घेऊन ग्राहक आपल्या सहलीच्या खर्चात मोठी बचत करू शकतात.
हे प्रदर्शन केवळ ग्राहकांसाठीच नव्हे, तर पर्यटन व्यवसायातील कंपन्यांसाठीही एक मोठे आणि हक्काचे व्यासपीठ आहे. हजारो संभाव्य आणि उत्सुक ग्राहकांना थेट भेटून आपल्या टूर पॅकेजेसची वैशिष्ट्ये समजावून सांगण्याची संधी कंपन्यांना मिळते. ग्राहकांशी होणारा थेट संवाद अधिक प्रभावी ठरतो, ज्यामुळे कंपन्यांना वर्षभर ग्राहक मिळण्यास मदत होते. आपल्या खास ऑफर्स थेट ग्राहकांपर्यंत पोहोचवून जागेवरच बुकिंग करण्यासाठी हे प्रदर्शन एक उत्तम माध्यम ठरणार आहे.
दैनिक ‘पुढारी’चे हे प्रदर्शन ग्राहक आणि व्यावसायिक या दोघांसाठीही एक ‘विन-विन’ सिच्युएशन असून, बेळगावमधील यशानंतर आता कोल्हापूर आणि सांगलीतील पर्यटनप्रेमी या महासोहळ्याची आतुरतेने वाट पाहत आहेत.