कोल्हापूर : कोल्हापूर जिल्हा परिषदेत मोठा भाऊ कोण यावरून महायुतीमधील भाजप आणि राष्ट्रवादी काँग्रेसमध्ये गेली महिनाभर सुरू असलेला संघर्ष अखेर संपला. सर्वाधिक जागा मिळाल्याने राष्ट्रवादी काँग्रेससलाच पहिल्या सव्वा वर्षासाठी अध्यक्षपद देण्याचा निर्णय राज्याचे मुख्यमंत्री देवेंद्र फडणवीस यांनी दिला आणि जिल्हा परिषद सत्तेतील महायुतीत राष्ट्रवादी काँग्रेसच मोठा भाऊ ठरला.
दरम्यान पुढील सव्वा वर्ष राष्ट्रवादी काँग्रेसच जिल्हा परिषदेत मोठा भाऊ ठरला आहे. पदाधिकारी निवडीच्या या राजकारणाला ‘गोकुळ’च्या निवडणुकीची किनार असल्याचे बोलले जात आहे. जिल्हा परिषदेत महायुतीला स्पष्ट बहुमत मिळाले असून महायुतीच्या घटक पक्ष व आघाडीतील घटकांना मिळून 51 जागा मिळाल्या आहेत.
याउलट महाविकास आघाडीला 17 जागा मिळाल्या आहेत. अध्यक्ष-उपाध्यक्ष पदावरून महायुतीमध्ये सुरू झालेला संघर्ष रविवारी मुख्यमंत्री देवेंद्र फडणवीस यांनी घेतलेल्या भूमिकेनंतर संपला. राष्ट्रवादी काँग्रेस, भाजप, शिवसेना व महायुतीतील इतर पक्षांना मिळून सवा वर्षासाठी हे पद देण्याचा तोडगा निघाला. सर्वच घटक पक्षांनी त्याला मान्यता दिली आहे. तूर्त जिल्हा परिषदेत राष्ट्रवादी काँग्रेसच मोठा भाऊ ठरला आहे.