कोल्हापूर : कोल्हापूर महापालिकेच्या होऊ घातलेल्या निवडणुकीसाठी प्रभाग रचना तयार करण्याचे काम अंतिम टप्प्यात आले आहे. हा प्रस्ताव जिल्हाधिकार्यांकडे सादर करण्याची मुदत गुरुवार, दि. 7 ऑगस्ट अशी असून महापालिका स्तरावर गेल्या आठ दिवसांपासून प्रभाग रचनेला अंतिम स्वरूप देण्याचे काम युद्धपातळीवर सुरू आहे.
शहरात यापूर्वी 81 प्रभाग होते. एक सदस्यीय पद्धतीने या प्रभागातून 81 नगरसेवक निवडले जात होते. यंदाच्या वर्षी प्रथमच बहुसदस्यीय पद्धतीने निवडणूक होणार असल्याने एका प्रभागातून चार नगरसेवक निवडून द्यायचे आहेत. त्यामुळे कोल्हापूर शहरात 20 प्रभाग होणार आहेत. 19 प्रभागांत प्रत्येकी चार, तर एका प्रभागात 5 नगरसेवक निवडून द्यावे लागणार आहेत. प्रभागांची संख्या 81 वरून 20 इतकी होणार असली, तरी त्याचे स्वरूप हे व्यापक राहणार आहे. एका प्रभागाची मतदारसंख्या 25 ते 30 हजार इतकी होण्याची शक्यता आहे.
राज्य निवडणूक आयोगाने निवडणूक प्रक्रिया राबविण्यासाठी जो कालबद्ध कार्यक्रम जाहीर केला आहे, त्या कार्यक्रमानुसार 7 ऑगस्टला प्रभागरचनेचे प्रारूप अंतिम करून महापालिकेने ते जिल्हाधिकार्यांकडे पाठवायची आहे. त्यानंतर 8 ते 12 ऑगस्टपर्यंत ही प्रभाग रचना जिल्हाधिकार्यांकडून नगरविकास विभागाला पाठविली जाणार आहे. नगरविकास विभागाकडून हे प्रारूप 13 ते 25 ऑगस्ट या कालावधीत राज्य निवडणूक आयोगाला पाठवायचे आहे. 3 सप्टेंबरला प्रभागरचनेचे हे प्रारूप प्रसिद्ध करुन त्यावर हरकती आणि सूचना मागवायच्या आहेत, तर 9 ऑक्टोबरला अंतिम प्रभाग रचना प्रसिद्ध होणार आहे.
* 7 ऑगस्टपर्यंत प्रभाग रचना जिल्हाधिकार्यांकडे सादर करणे
* 8 ते 12 ऑगस्ट दरम्यान प्रस्ताव नगरविकास विभागाकडे पाठवणार
* 13 ते 25 ऑगस्टदरम्यान नगरविकास विभाग हे प्रस्ताव निवडणूक आयोगाकडे सुपूर्द करेल
* 3 सप्टेंबर रोजी प्रारूप प्रभागरचना प्रसिद्ध
* 9 ते 18 सप्टेंबरदरम्यान हरकती व सूचनांवर सुनावणी घेणे
* 9 ऑक्टोबरला अंतिम प्रभाग रचना घोषित