कोल्हापूर : कोल्हापूर महापालिकेच्या निवडणुकीसाठी मतदान प्रक्रिया पूर्ण झाली असून शुक्रवारी सकाळी 10 वाजचा चार विविध ठिकाणी मतमोजणी होणार असून यासाठी 300 कर्मचार्यांची नियुक्ती केली आहे. निवडणूक निर्णय अधिकारी कार्यालयानुसार मतमोजणी होणार आहे. एका प्रभागाची मतमोजणी करताना तीन फेर्या होणार आहेत.
कोल्हापूर महापालिकेच्या निवडणुकीसाठी 64 टक्क्यांहून अधिक मतदान झाले आहे. शुक्रवारी सकाळी कसबा बावडा, रमणमळा येथील महसूल विभागाचे बहुउद्देेशीय सभागृह, व्ही. टी. पाटील स्मृतिभवन, दुधाळी पॅव्हेलियन हॉल, गांधी मैदान पॅव्हेलियन हॉल येथे मतमोजणी होणार आहे. मतमोजणीसाठी या चारही ठिकाणी स्वतंत्र मंडप व्यवस्था करण्यात आली आहे. सकाळी दहा वाजता सुरुवातीला पोस्टल मते मोजली जाणार आहेत. त्यानंतर प्रत्येक निवडणूक कार्यालयातील एका प्रभागाची मतदान यंत्रे घेऊन मतमोजणी केली जाणार आहे. एका प्रभागाची मतमोजणी पूर्ण झाल्यानंतर दुसर्या प्रभागाची मतमोजणी पूर्ण होईल. दुपारी दोन वाजेपर्यंत निकालाची संपूर्ण प्रक्रिया पूर्ण केली जाईल, असे अधिकारी वर्गातून सांगितले जात आहे.
शुक्रवारी सकाळी 9 वाजता चार ठिकाणी मतमोजणीची प्रक्रिया सुरू केली जाणार आहे. स्ट्रॉग रूममधून ईव्हीएम मशिन मतमोजणीच्या ठिकाणी आणली जातील, त्यानंतर सकाळी 10 वाजता मतमोजणीची प्रक्रिया सुरू केली जाईल. प्रथम टपाली मतदानाची मोजणी होणार आहे. टपाली मतमोजणी पूर्ण होताच, ईव्हीएममधील मतमोजणी सुरू होईल. पहिला निकाल पहिल्या एका तासातच जाहीर होईल.
15 टेबलवर मतमोजणी, 300 कर्मचारी
मतमोजणीसाठी महापालिका प्रशासनाची सर्व तयारी पूर्ण झाली आहे. 15 टेबलवर मतमोजणी होणार आहे. याकरिता 300 कर्मचारी तैनात केले आहेत. एका टेबलवर 1 सुपरवायझर, 1 सहायक आणि 1 शिपाई असणार आहे. तसेच प्रत्येक मतदान केंद्रात प्रत्येक उमेदवाराचा एक प्रतिनिधी असणार आहे.