चंदगड : उपजिल्हाधिकारी यांचा बनावट आदेश तयार करून मळवीवाडी (ता. चंदगड) येथील १२ एकर सरकारी जमीन विक्री झाल्याप्रकरणी तुर्केवाडी मंडल अधिकार्यासह दोन तलाठ्यांना जिल्हाधिकारी विजय राठोड यांच्या निर्देशानुसार निलंबित केले आहे.
या प्रकरणात बनावट आदेश केल्याप्रकरणी गुन्हा दाखल झालेला तातोबा भिकाजी गावडा (रा. मुगळी, ता. चंदगड) हा संशयित मागील १७ दिवसांपासून फरार आहे. या प्रकरणाचा तपास गडहिंग्लज उपविभागाचे पोलिस उपअधीक्षक विवेक पाटील करत आहेत. याप्रकरणी तुर्केवाडी (ता. चंदगड) मंडल अधिकारी बाळासो सरगर, तुडये सज्जाचे (ता. चंदगड) तलाठी गणेश रहाटे, सुरुते सज्जाचे (ता. चंदगड) तलाठी अशोक बुरूड या तिघांवर निलंबनाची कारवाई करण्यात आली आहे.
मळवीवाडी येथील चार भोगवटादार शेतकरी यांना अंधारात ठेवून १२ एकर शासकीय जमीन अपर जिल्हाधिकारी यांचा वर्ग-दोनमधून वर्ग-एकचा बनावट आदेश तयार करून तिसर्याच एका व्यक्तीला विक्री करण्यात आली होती.