शिरोली एमआयडीसी: कोल्हापूर-सांगली राज्य महामार्गावर ट्रकने दुचाकीस धडक दिल्याने दुचाकीस्वार जागीच ठार झाला. हा अपघात गुरूवारी (दि.18) रात्री ९ वाजताच्या सुमारास पुलाची शिरोली येथील मार्बल मार्केट येथील गोल्डन मार्बल दुकानासमोर झाला. प्रणव रावसो पाटील ( वय 25, रा. माणगाववाडी, ता. हातकणंगले ) असे मयत तरूणाचे नाव आहे.
अधिक माहिती अशी की, प्रणव पाटील हा कोल्हापूर येथील खासगी मेडीकल शाॅपमध्ये फार्मासिस्ट म्हणून काम करत होता. तो आज आपली ड्युटी संपवून आपल्या मोटरसायकलवरून गावी माणगाववाडी घरी जात असताना मागून येणाऱ्या ट्रकने जोराची धडक दिल्याने त्याचा जागीच मृत्यू झाला.
प्रणवच्या लहान वयातच त्याच्या वडीलांचे निधन झाल्याने त्याच्या आईने त्याला लहानाचे मोठे केले, त्याच्यावर चांगले संस्कारासह शिक्षण देवून फार्मसी कोर्सचे शिक्षण पुर्ण केले. तो कोल्हापूर येथील मेडिकलमध्ये काम करत होता. त्याच्या अशा अपघाती निधनाने त्याच्या आईवर दुःखाचा डोंगर कोसळला. या अपघाताची माहिती माणगाववाडी वाऱ्यासारखी पसरल्याने गावावर शोककळा पसरली.