पाचगाव : कळंबा येथील बापूरामनगर परिसरातील बाबुराव शंकर गोसावी (वय ५३) यांचा रविवारी (दि. ९) मॉर्निंग वॉकला गेले असताना कारच्या धडकेत जागीच मृत्यू झाला.
याबाबत अधिक माहिती अशी, गोसावी हे रविवारी सकाळी सहाच्या सुमारास मॉर्निंग वॉकसाठी घराबाहेर पडले होते. कळंबा गावच्या हद्दीत एका कार वॉश सेंटरजवळ ते आले असता गारगोटीहून कोल्हापूरच्या दिशेने येणाऱ्या कारने (एमएच ४२ बीडब्ल्यू ६१२३) त्यांना जोराची धडक दिली. कारचालकाने भरधाव व निष्काळजीपणे वाहन चालविल्याने हा अपघात झाला. या धडकेमध्ये गंभीर जखमी झालेल्या बाबुराव गोसावी यांचा जागीच मृत्यू झाला. अपघातानंतर कारचालकाने वाहन घटनास्थळावरच सोडून पळ काढला. याप्रकरणी राजाराम शंकर गोसावी यांनी करवीर पोलिस ठाण्यात फिर्याद दिली आहे. त्यानुसार अज्ञात कारचालकाविरुद्ध गुन्हा दाखल करण्यात आला आहे. पोलिस हवालदार गडकरी अधिक तपास करीत आहेत.