कोल्हापूर शहर पुन्हा एकदा एका विचित्र खून प्रकरणाने हादरून गेले आहे. विश्वपंढरी ते हॉकी स्टेडियम रोड या शांत परिसरात मध्यरात्री झालेल्या या घटनेने नागरिकांमध्ये प्रचंड दहशत निर्माण झाली आहे. रात्री जवळपास दोनच्या सुमारास घडलेल्या या खून प्रकरणात एका अज्ञात तरुणाची अत्यंत निर्घृण हत्या करण्यात आली. रस्त्यालगत असलेल्या विद्युत खांबाला त्याला वायरने बांधून त्याचाच गळा आवळण्यात आल्याची धक्कादायक माहिती समोर आली आहे.
रात्रीचा काळोख आणि रस्त्यावर वाहतुकीचा पूर्ण अभाव असल्याने गुन्हेगारांनी अत्यंत शांतपणे आणि नियोजनपूर्वक हा प्रकार केल्याचे प्राथमिक तपासात समोर येत आहे. घटनास्थळी पोलिसांना मृत तरुणाचा देह विद्युत खांबाला बांधलेल्या अवस्थेत आढळला.
मृत तरुणाची ओळख अद्याप पटलेली नाही.पोलिसांनी सार्वत्रिक सूचना देत त्याचा फोटो आसपासच्या पोलीस ठाण्यांमध्ये पाठवला आहे. जवळपासच्या सीसीटीव्ही कॅमेऱ्यांचे फुटेज पोलिसांकडून गोळा केले जात असून रात्रीच्या सुमारास कोणतीही हालचाल, दोन–चाकी किंवा चार–चाकी वाहने आढळतात का, याचा माग काढला जात आहे
हा परिसर दिवसाढवळ्या फार वर्दळीचा असतो; मात्र रात्री उशिरा तेथे पूर्ण शांतता असते. त्यामुळे गुन्हेगारांनी हाच निर्जन भाग निवडल्याची शक्यता आहे. पोलिसांचा प्राथमिक अंदाज आहे.
खूनाचा हेतू नेमका काय होता? मृत तरुणाची ओळख काय? हा प्रकार कोणत्या जुन्या वैमनस्यातून करण्यात आला? की आर्थिक व्यवहारातून किंवा वैयक्तिक सूडातून? हे सर्व प्रश्न अद्याप अनुत्तरित आहेत. पोलिसांनी मात्र तपास गतीमान केला असून गुन्हेगार लवकरच जेरबंद होतील असा विश्वास त्यांनी व्यक्त केला आहे.