उत्तूर : उत्तूर-भादवण मार्गावर मडिलगे गावच्या हद्दीत अज्ञात वाहनाच्या धडकेत होन्याळी (ता. आजरा) येथील जोतिबा पुंडलिक सूर्यवंशी (वय ६०) यांचा मृत्यू झाला. रस्त्याच्या कडेला गवतामध्ये झोपलेल्या सूर्यवंशी यांच्या डोक्यावरून वाहनाचे चाक गेल्याने त्यांचा मृत्यू झाला. ही घटना मंगळवारी सकाळी नऊच्या सुमारास रविराज हॉटेलजवळ घडली.
मिळालेल्या माहितीनुसार, जोतिबा सूर्यवंशी हे उत्तूर-भादवण मार्गावरील मडिलगे गावच्या हद्दीत रस्त्याच्या बाजूला गवतामध्ये झोपले होते. यावेळी तेथून जाणाऱ्या अज्ञात वाहनाचे चाक त्यांच्या डोक्यावरून गेल्याने ते गंभीर जखमी झाले. या अपघातात त्यांचा मृत्यू झाला. अपघातानंतर जखमीला मदत न करता तसेच पोलिसांना माहिती न देता संबंधित वाहनचालक घटनास्थळावरून पसार झाला. या प्रकरणी पंकज सूर्यवंशी यांनी आजरा पोलिसांत फिर्याद दिली आहे. त्यानुसार अज्ञात वाहनचालकाविरोधात गुन्हा दाखल करण्यात आला असून, पुढील तपास हेडकॉन्स्टेबल येलकर करीत आहेत.