कोल्हापूर : धारदार तलवारीच्या धाकावर विक्रमनगर, जोशी गल्ली परिसरात दहशत माजविणाऱ्या कृष्णा प्रकाश मच्छले (वय ३९, रा. जोशी गल्ली, कोल्हापूर) यास राजारामपुरी पोलिसांनी सोमवारी छापा टाकून अटक केली. संशयिताकडून दोन तलवारी हस्तगत करण्यात आल्या आहेत.
रिक्षाचालक साद पठाण याच्या खुनानंतर राजारामपुरी पोलिसांनी विक्रमनगर, टेंबलाईवाडीसह परिसरातील सराईत गुन्हेगारांविरूद्ध प्रतिबंधात्मक कारवाईची मोहीम सुरू केली आहे. संशयित कृष्णा मच्छले हा धारदार तलवारी बाळगून परिसरात दहशत माजवित असल्याची माहिती मिळताच पोलिस निरीक्षक विकास जाधव, उपनिरीक्षक सचिन चंदन, अमोल पाटील, शाहू तळेकर यांनी सोमवारी सकाळी छापा टाकून संशयितास ताब्यात घेतले. चौकशीअंती पथकाने जोशी गल्ली येथील पत्र्याच्या शेडची झडती घेऊन दोन तलवारी हस्तगत केल्या. संशयिताविरूद्ध गुन्हा दाखल करण्यात आला आहे. दरम्यान, जोशी गल्लीतील शेडमधून दोन हजार रुपये किमतीचा दारुसाठा पोलिसांनी जप्त केला.