इचलकरंजी : चंदूर (ता. हातकणंगले) येथे उत्सवाच्या अनुषंगाने काढण्यात आलेल्या मोटारसायकल रॅलीवेळी दोन गटांत जोरदार हाणामारी झाली. यावेळी दगडफेक झाली. यामध्ये पवन दिलीप गुरव व प्रमोद चव्हाण हे दोघे पोलिस जखमी झाले, तर पोलिस वाहनाचेही नुकसान झाले.
या घटनेमुळे सिद्धार्थनगर परिसरात तणावाचे वातावरण होते. शिवाजीनगर पोलिसांनी जि.प. सदस्य महेश पाटील यांच्यासह तब्बल 30 जणांवर गुन्हा दाखल केला आहे. चंदूर येथे उत्सवाच्या अनुषंगाने युवकांचा जमाव दुचाकीवरून जल्लोष करीत निघाला होता. यावेळी दुसऱ्या गटातील युवकांमध्ये वाद झाला. वादाचे पर्यवसन धक्काबुक्की, हाणामारीत झाले. याची माहिती समजताच शिवाजीनगर पोलिसांच्या पथकाने धाव घेतली. त्यांनी जमावाला शांत करण्याचा प्रयत्न केला. यावेळी एका जमावाकडून दगडफेक सुरू झाली.