कुरुंदवाड : तेरवाड (ता. शिरोळ) येथील गणेशनगर परिसरात रविवारी रात्री अज्ञात चोरट्यांनी दुकानाचे शटर उचकटून मेडिकल दुकानातील 2 लाख 25 हजार रुपये रोख व सीसीटीव्ही कॅमेरा चोरून नेला.
याच दरम्यान, लालनगर परिसरात नाजुका गणपती गोसावी यांच्या बंद घराचे कुलूप उचकटून घरातील 2 लाख रुपये रोख तसेच सुमारे 41 हजार रुपये किमतीची पितळी व तांब्यांची भांडी लंपास केली. दोन ठिकाणी झालेल्या चोरीच्या घटनांमध्ये रोख रक्कम व मौल्यवान वस्तूंसह एकूण 4 लाख 67 हजार 500 रुपयांचा ऐवज चोरट्यांनी लंपास केला आहे. ही घटना रविवारी (दि. 18) मध्यरात्रीच्या सुमारास घडली असून सोमवारी सकाळी चोरीचा प्रकार उघडकीस आला.