कोल्हापूर : राज्यातील अनुदानास पात्र शाळा आणि वाढीव तुकड्यांना वेळेत अनुदान मिळावे. तसेच २०, ४०, ६० आणि ८० टक्के अनुदानावर असलेल्या सर्व पात्र शाळांना एकरकमी शंभर टक्के पूर्ण अनुदान मिळावे, यासाठी शासनदरबारी ठोस पाठपुरावा करणार असल्याची ग्वाही पुणे विभाग शिक्षक मतदारसंघाचे भाजपा-महायुतीचे उमेदवार शिक्षकमित्र कौस्तुभ गावडे यांनी दिली.
राज्यातील अनेक शाळा वर्षानुवर्षे अंशतः अनुदानाच्या टप्प्यांमध्ये अडकल्या आहेत. अनुदानाचे पुढील टप्पे मिळण्यासाठी चार ते पाच वर्षांपेक्षा अधिक काळ प्रतीक्षा करावी लागते. काही शाळांना पूर्ण अनुदान मिळण्यासाठी दोन ते अडीच दशके लागतात. या विलंबामुळे शिक्षक आणि शिक्षकेतर कर्मचाऱ्यांना आर्थिक अडचणींचा सामना करावा लागत असून त्यांच्या कौटुंबिक जबाबदाऱ्यांवरही परिणाम होत असल्याचे गावडे यांनी नमूद केले.
शासनाने निश्चित केलेले निकष पूर्ण करणाऱ्या शाळा आणि वाढीव तुकड्यांना निर्धारित वेळेत अनुदान मिळण्यासाठी ठोस धोरण राबविण्याची मागणी करण्यात येणार आहे. तसेच राज्यातील शिक्षणव्यवस्थेत अनुदानित आणि स्वयंअर्थसहाय्यित असे दोनच प्रकार असावेत, यासाठी निर्णायक लढा उभारणार असल्याचे गावडे यांनी सांगितले. शिक्षकांचे आर्थिक स्थैर्य, संस्थांचे प्रश्न आणि विद्यार्थ्यांना दर्जेदार शिक्षण मिळण्यासाठी विधिमंडळात तसेच शासनस्तरावर सातत्याने आवाज उठविणार असल्याचा निर्धारही त्यांनी व्यक्त केला.
सर्व पात्र संस्थांना पूर्ण अनुदान मिळणे आवश्यक
पात्र शिक्षक व शिक्षकेतर कर्मचाऱ्यांसाठी २० टक्के वाढीव टप्पा अनुदान मंजूर करण्याचा निर्णय महायुती सरकारने घेतला आहे; मात्र केवळ टप्प्याटप्प्याने अनुदान देण्याऐवजी सर्व पात्र संस्थांना पूर्ण अनुदान मिळणे आवश्यक आहे, अशी भूमिका कौस्तुभ गावडे यांनी मांडली.