Gokul Dudh Sangh Election Nomination Forms
आशिष पाटील
गुडाळ : गोकुळ दूध संघाच्या निवडणुकीसाठी उमेदवारी अर्ज दाखल करण्याच्या दुसर्या दिवशी सर्वसाधारण, इतर मागासवर्गीय आणि महिला राखीव गटातून एकूण १२ उमेदवारांनी अर्ज दाखल केले. विशेष म्हणजे, या तीनही गटांतून संघाचे माजी चेअरमन विश्वासराव पाटील यांच्या कुटुंबातील सदस्यांनी सहा अर्ज दाखल केले आहेत. दरम्यान, विमुक्त भटक्या जाती आणि अनुसूचित जाती या दोन गटांत अद्याप एकही अर्ज दाखल झालेला नाही.
उमेदवारी अर्ज विक्रीच्या दुसर्या दिवशी १३० अर्जांची विक्री झाली. त्यामुळे आतापर्यंत विक्री झालेल्या उमेदवारी अर्जांची एकूण संख्या ६०० वर पोहोचली आहे. अर्ज दाखल करण्याची अंतिम मुदत २२ सप्टेंबर असल्याने आगामी दिवसांत मोठ्या संख्येने अर्ज दाखल होण्याची शक्यता व्यक्त होत आहे.
सर्वसाधारण गटातून माजी चेअरमन विश्वासराव पाटील, त्यांचे सुपुत्र सचिन पाटील आणि स्नुषा पल्लवी सचिन पाटील यांनी अर्ज दाखल केले. याशिवाय हंबीरराव वळके (निगवे दुमाला), विकास पाटील (गोगवे) आणि सुरेश देसाई (म्हसवे) यांनीही उमेदवारी अर्ज भरले.
इतर मागासवर्गीय गटातून विश्वासराव पाटील आणि सचिन पाटील यांनी अर्ज दाखल केले. तसेच अॅड. सुरेशराव कुराडे यांनीही या गटातून उमेदवारी अर्ज दाखल केला.
महिला राखीव गटातून पल्लवी सचिन पाटील (माळ्याची शिरोली), रेखा सुरेश कुराडे (ऐनापूर) आणि वंदना आदिनाथ भावके (वाडीचरण) यांनी अर्ज दाखल केले.
गुरुवार, १७ सप्टेंबर रोजी राष्ट्रवादी काँग्रेस, शिवसेना आणि जनसुराज्य पक्षाच्या वतीने सामुदायिकरीत्या उमेदवारी अर्ज दाखल करण्यात येणार आहेत. तसेच आमदार सतेज पाटील यांच्या नेतृत्वाखालील राजर्षी शाहू शेतकरी समविचारी आघाडीच्या वतीनेही गुरुवारी अर्ज दाखल केले जाणार आहेत. त्यामुळे गुरुवारी उमेदवारी अर्ज दाखल करण्यासाठी मोठी गर्दी होण्याची शक्यता आहे.