कोल्हापूर : बेळगावहून पुण्याला निघालेली खासगी ट्रॅव्हल्सची बस जळून खाक झाली. यामध्ये एका प्रवाशाचा जळून मृत्यू झाला. पुणे-बंगळूर महामार्गावर गोकुळ शिरगाव ते उजळाईवाडीदरम्यान शुक्रवारी रात्री बाराच्या सुमारास हा ‘बर्निंग बस’चा थरार घडला. या भीषण दुर्घटनेत एका प्रवाशाचा दुर्दैवी मृत्यू झाला. अन्य सहा प्रवासी सुदैवाने बचावले. आग लागताच बसचालक व सहायक घटनास्थळावरून पसार झाले.
गोकुळ शिरगाव येथे बस येताच अचानक इंजिनने पेट घेतला. इंजिनला आग लागल्याचे पाहताच चालक आणि सहायकाने घटनास्थळावरून पलायन केले. बसमधील प्रवासी गडबडीने खाली उतरले. मात्र, एक प्रवासी झोपेत असल्याने बसमध्येच अडकल्याने त्याचा होरपळून मृत्यू झाला. काही वेळातच संपूर्ण बसने पेट घेतला. कोल्हापूर मनपाच्या अग्निशमन दलाने ही आग आटोक्यात आणली.