कोल्हापूर : करवीर निवासिनी श्री अंबाबाई मूर्तीची संवर्धन प्रक्रिया सोमवारी (दि. 11) व मंगळवारी (दि. 12) करण्यात येणार आहे. या दोन दिवसांमध्ये भाविकांसाठी मूळ मूर्तीचे दर्शन बंद राहणार असून उत्सवमूर्ती व कलश दर्शनाची सुविधा उपलब्ध करून देण्यात आली आहे, अशी माहिती देवस्थान समितीचे सचिव शिवराज नाईकवाडे यांनी दिली.
केंद्रीय पुरातत्त्व विभागाच्या वतीने अंबाबाई मूर्तीचे संवर्धन केले जाणार आहे. याबाबतचा प्रस्ताव 16 एप्रिल 2024 रोजी देवस्थान समितीने पुरातत्त्व विभागाला पाठवला होता. त्यानुसार 12 जून 2025 रोजी केंद्रीय पुरातत्त्व विभागाने आवश्यक ती संवंर्धन प्रक्रिया करावी, असे पत्र पाठवले होते.
सध्या श्रावण महिना सुरू असल्याने भाविकांची अंबाबाई मंदिरात दर्शनासाठी गर्दी होत आहे. संवर्धन प्रक्रियेच्या पार्श्वभूमीवर श्रावण सोमवार तसेच श्रावणातील मंगळवारी भाविकांना मूळ मूर्तीचे दर्शन घेता येणार नाही. मात्र अंबाबाईची उत्सव मूर्ती आणि कलश दर्शनाची सोय मंदिरातील पितळी उंबर्याच्या बाहेरून घेता येईल, अशी सोय देवस्थान समितीच्या वतीने करण्यात आली आहे.