कोल्हापूर : कोल्हापूर महापालिका निवडणुकीसाठी प्रशासकीय निवडणूक यंत्रणा सज्ज ठेवण्यासाठी युद्धपातळीवर तयारी सुरू केली आहे. या पार्श्वभूमीवर निवडणूक प्रक्रियेत प्रत्यक्ष सहभागी असलेल्या शासकीय अधिकारी व कर्मचार्यांसाठी शनिवारी पोस्टल मतदानाची प्रक्रिया पार पडली. पहिल्या दिवशी 442 कर्मचार्यांनी मतदानाचा हक्क बजावला.
शहरातील सात निवडणूक निर्णय अधिकारी कार्यालयांमध्ये ही प्रक्रिया पार पडली. यामध्ये 197 महिला व 245 पुरुष कर्मचार्यांचा समावेश होता. निवडणुकीच्या दिवशी हे कर्मचारी मतदान प्रक्रियेत गुंतलेले असल्याने त्यांना प्रत्यक्ष मतदान करता येणार नाही. त्यामुळे शनिवार व रविवार असे दोन दिवस पोस्टल मतदानासाठी राखीव ठेवले आहेत. रविवारी उर्वरित सर्व कर्मचार्यांचे मतदान होणार आहे.
महापालिकेची निवडणूक निष्पक्ष व सुरळीत पार पाडण्यासाठी प्रशासन सज्ज असून, येत्या चार दिवसांत निवडणूक यंत्रणा अधिकच सक्रिय होणार आहे. महापालिका निवडणुकीच्या अनुषंगाने ‘माध्यम प्रमाणन व सनियंत्रण समिती माध्यम कक्ष’ (मीडिया कक्ष) स्थापन करण्यात आला आहे. हा कक्ष बागल मार्केट, राजारामपुरी येथील नगररचना विभाग कार्यालयाशेजारी कार्यरत आहे. विहित वेळेत अर्ज मंजुरी प्रक्रिया पूर्ण होण्यासाठी सोमवार, दि. 12 जानेवारी रोजी दुपारी दोनपर्यंतच अर्ज स्वीकारले जाणार आहेत.
राजकीय वातावरण तापले
शहरात प्रचारफेर्या, सभा, रॅली यांमुळे राजकीय वातावरण चांगलेच तापले असताना, प्रशासनाकडून मात्र शांत, पारदर्शक आणि निर्भय मतदानासाठी आवश्यक ती सर्व तयारी केली जात आहे. पोस्टल मतदानाची प्रक्रिया सुरळीत पार पडल्याने प्रशासनाच्या नियोजनावर समाधान व्यक्त केले जात आहे.