खेड; पुढारी वृत्तसेवा : मुंबई-गोवा महामार्गावर भोस्ते घाटामध्ये महामार्गाच्या बाजूला असलेल्या खड्ड्यात गुरुवारी (दि.३) सायंकाळी ६ वाजताच्या सुमारास दोन ट्रक कोसळून भीषण अपघात झाला. यामध्ये महामार्गाच्या डाव्या बाजूला सुमारे पस्तीस फूट खोल हे दोन्ही ट्रक कोसळले. यातील एका ट्रकमध्ये तीन ते चार लोक अडकल्याची भीती व्यक्त केली जात आहे. माशांचे जाळे घेऊन जाणारा एक आयशर ट्रक व कंटेनर यांच्यात हा अपघात झाला आहे.
घटनास्थळी जेसीबी यंत्राच्या सहायाने स्थानिक लोक टेम्पोमध्ये अडकलेल्या लोकांची सुटका करण्याचा प्रयत्न करत आहेत. माशांचे जाळे घेऊन जाणारा आयशर टेम्पोमध्ये काही लोक अडकल्याची भीती आहे तर लॉजिस्टिक कंटेनर देखील याच टेम्पो शेजारी पलटी झाला आहे. सायंकाळी (दि. ३) पाच वाजण्याच्या सुमारास हा अपघात झाला. दोन्हीही वाहने गोव्याहून मुंबईच्या दिशेने जात होती. भोस्ते घाट उतरत असताना अवघड वळणाच्या काही अंतर अलीकडे महामार्गाच्या डाव्या बाजूला मोठ्या खड्ड्यामध्ये आयशर टेम्पो तब्बल 35 ते 40 फूट खड्ड्यात कोसळला व त्या पाठोपाठ लॉजिस्टिक कंटेनर देखील पलटी झाला. एका टेम्पो मध्ये समुद्राच्या पाण्यात मासे पकडण्यासाठी लागणारे मोठे जाळे होते. तसेच काही लोकांचे वाचवा वाचवा म्हणून आवाज देखील येत होते. त्यामुळे या टेम्पोमध्ये तीन ते चार लोक अडकल्याची शक्यता वर्तवली जात आहे. अपघात झाल्यानंतर खेडमधील तरुणांनी तसेच मोरवंडे बोरस परिसरातल्या मदतगार तरुणांनी घटनास्थळी धाव घेतली तसेच इतर वाहन चालक देखील थांबले होते अडकलेल्या लोकांची सुटका करण्याचे काम तब्बल दीड तास सुरू होते टेम्पो मधील माशांच्या जाळ्यामध्ये हे लोक घुरफटले असल्यामुळे मदत कार्यास मोठा अडथळा येत होता. संध्याकाळी उशिरापर्यंत हे मदत कार्य सुरू होते.