दोडामार्ग: दोडामार्ग तालुक्यातील झोळंबे गावात रविवारी सायंकाळी एका महाकाय किंग कोब्रा सापाने दर्शन दिल्याने एकच खळबळ उडाली. तब्बल 15 फूट लांबीचा हा विषारी साप रहदारीच्या रस्त्यावर फिरत असताना गावकर्यांनी पाहिला.
गावकर्यांनी तातडीने सर्पमित्र विठ्ठल गवस यांना संपर्क साधला. गवस यांनी घटनास्थळी धाव घेऊन सापाची पाहणी केली असता, तो किंग कोब्रा असल्याचे त्यांच्या लक्षात आले. किंग कोब्रा हा अत्यंत विषारी आणि धोकादायक मानला जातो. त्यामुळे गावकर्यांमध्ये भीतीचे वातावरण पसरले होते.
अतिशय शिताफीने बचाव : सर्पमित्र विठ्ठल गवस यांनी कोणतीही गडबड न करता अत्यंत तत्परतेने आणि शिताफीने या सापाला पकडले. सापाला पकडल्यानंतर गावकर्यांनी सुटकेचा नि:श्वास सोडला. या घटनेनंतर वन विभागाने गावकर्यांमध्ये सापांबद्दल जनजागृती केली. सापांना न मारता त्यांना सुरक्षितपणे पकडून वन विभागाच्या ताब्यात देण्याचे आवाहन करण्यात आले.
या घटनेची माहिती वनविभागाला देण्यात आली. दोडामार्ग वनविभागाचे पथक तत्काळ घटनास्थळी दाखल झाले. वनविभाग आणि सर्पमित्र विठ्ठल गवस यांच्या संयुक्त प्रयत्नांमुळे सापाला सुरक्षितपणे जंगलात सोडण्यात आले.