ओरोस : सिंधुदुर्ग रेल्वे स्थानक हे जिल्हा मुख्यालयाचे ठिकाण असल्याने या ठिकाणी पोस्ट खात्यात असलेली तिकीट बुकिंग सुविधा सिंधुदुर्ग रेल्वे स्थानकावर उपलब्ध करून देण्यात यावी. या प्रमुख मागणीसह स्थानकावरील समस्यांकडे कोकण रेल्वे प्रवासी समन्वय समितीने जिल्हयातील रेल्वे स्थानकांची पाहणी करण्यासाठी आलेल्या अधिकार्यांचे लक्ष वेधले.
कोकण रेल्वेचे वरिष्ठ अधिकारी मधुकर मातोंडकर, शैलेश अंबाडेकर, विजय सामंत, वीज इंजिनिअर चिन्मय अंधारी हे सिंधुदुर्ग जिल्हयातील रेल्वे स्थानकाची पाहणी करण्यासाठी जिल्हयात आले असून त्यांनी रविवारी खारेपाटण ते कणकवली रेल्वेस्थानक परिसराची पाहणी केली. त्यानंतर ते आज सिंधुदुर्ग रेल्वे स्थानकाच्या पाहणीसाठी आले होते. यावेळी कोकण रेल्वे प्रवासी समन्वय समिती सिंधुदुर्गच्यावतीने या अधिकार्यांची भेट घेण्यात आली.
यावेळी कोकण रेल्वे प्रवासी समन्वय संघर्ष समितीचे अध्यक्ष प्रकाश पावसकर, सचिव अजय मयेकर, नागेश ओरोसकर, स्वप्निल गावडे त्यांच्यासह संघटनेचे पदाधिकारी, रिक्षा युनियनचे पदाधिकारी उपस्थित होते.विविध मागण्यांकडे वेधले लक्षसिंधुदुर्ग रेल्वे स्थानक हे जिल्हा मुख्यालयाचे ठिकाण असल्याने या ठिकाणी तिकीट बुकिंग सुविधा असणे आवश्यक आहे. मात्र या ठिकाणी ही सुविधा नसून ती पोस्ट कार्यालयात आहे. परंतु तेथील ही सुविधा अनेक वेळा बंद असते.
परिणामी नागरिकांना तिकीट मिळत नाही. त्यामुळे पोस्ट कार्यालयात असलेली तिकीट बुकिंग सुविधा सिंधुदुर्ग रेल्वे स्थानकावर उपलब्ध करून देण्यात यावी. तसेच स्थानक परिसरात झाडेझुडपे वाढली आहेत. पाण्याची गळती सुरू असून पाणी वाया जात आहे. प्रवाशांना बसण्याची सुविधा उपलब्ध करावी. फलाटावर छत उभारण्यात यावे. शौचालयांची स्वच्छता करण्यात यावी यासह अन्य मागण्यांकडे लक्ष वेधण्यात आले.