वेंगुर्ले : तालुक्यातील होडावडा नं. १ शाळेत ६० पटसंख्या असताना गेले वर्षभर केवळ २ शिक्षक असल्याने याचा विद्यार्थ्यांवर व शाळेच्या गुणवत्तेवर परिणाम झाल्याचा आरोप करत व वारंवार पाठपुरावा करून अतिरिक्त शिक्षक मिळत नसल्याने अखेर संतप्त पालकांनी सोमवारी उन्हाळी सुट्टीनंतर शाळेच्या पहिल्याच दिवशी चक्क वेंगुर्ले पं. स. इमारतीत शाळा भरवली. सभापती शंकर घारे, जिल्हा परिषद आरोग्य व शिक्षण सभापती प्रितेश राऊळ यांनी यशस्वी तोडगा काढल्यानंतर मुलांना होडावडा नं. १ येथे पुन्हा पाठवण्यात आले.
उन्हाळी सुट्टीनंतर सोमवारी संपूर्ण जिल्ह्यातील शाळा पुन्हा गजबजल्या. मात्र, होडावडा नं. १ च्या विद्यार्थ्यांना पालकांनी चक्क पहिल्या दिवशी वेंगुर्ला पं. स. इमारतीत सर्व विद्यार्थ्यांना आणत याच ठिकाणी शाळा भरवली. गेली ४ वर्षे या शाळेत शिक्षकांची कमतरता आहे. शाळेचे २ शिक्षक व इतर कामगिरी शिक्षक देऊन हा गाडा चालवला जात आहे. वारंवार कायमस्वरूपी शिक्षक मिळण्यासाठी आम्ही पाठपुरावा करत होतो. शाळेची पटसंख्या ६० असताना केवळ २ शिक्षक शाळेत आहे. जोपर्यंत अतिरिक्त शिक्षक शाळेला मिळत नाही तोपर्यंत मुलांची शाळा रोज पंचायत समितीत भरवण्याचा पवित्रा ग्रामस्थ व पालकांनी घेतला.
दोन दिवसांत शिक्षक देण्याचे आश्वासन
सभापती शंकर घारे, जि.प. आरोग्य व शिक्षण सभापती प्रितेश राऊळ, प्रभारी गटविकास अधिकारी दिनेश पाटकर, गटशिक्षण अधिकारी संतोष गोसावी यांनी एकत्रित यावर चर्चा करून यशस्वी तोडगा काढला. यानंतर गटशिक्षणाधिकारी संतोष गोसावी यांनी होडावडा नं. १ शाळेला पुढील २ दिवसांत तात्पुरत्या स्वरूपात व शैक्षणिक वर्षात १ शिक्षक देण्यात येईल, असे आश्वासन दिल्या नंतर हे आंदोलन मागे घेण्यात आले.