देवगड: देवगड–नांदगाव महामार्गावरील हडपीड येथील कुलस्वामिनी मंदिरासमोरील धोकादायक वळणावर बुधवारी मध्यरात्री झालेल्या भीषण अपघातात विनायक धोंडू पुजारे (वय २२, रा. कोटकामते आडिवरेवाडी) याचा जागीच मृत्यू झाला. तर त्याच्यासोबत दुचाकीवर असलेला निखिल नारायण नवलू (वय २४, रा. कोटकामते आडिवरेवाडी) हा गंभीर जखमी झाला असून त्याच्यावर गोवा-बांबुळी येथे उपचार सुरू आहेत. अपघात बुधवारी (दि.४) रात्री १.१५ वाजता घडला.
पोलिसांनी दिलेल्या माहितीनुसार, कोळोशी वरचीवाडी येथील रिक्षाचालक बाळकृष्ण नागोजी खरात हे आपल्या रिक्षाने देवगडहून कोळोशीकडे जात होते. त्याचवेळी विनायक पुजारे हा आपल्या दुचाकीवर निखिल नवलू याच्यासह नांदगावहून कोटकामतेच्या दिशेने प्रवास करत होता. हडपीड येथील अवघड वळणावर विनायक पुजारे याचे दुचाकीवरील नियंत्रण सुटले आणि भरधाव वेगात दुचाकी रस्त्याच्या विरुद्ध दिशेने जाऊन समोरून येणाऱ्या रिक्षाला जोरदार धडकली. धडक एवढी भीषण होती की विनायक पुजारे जागीच ठार झाला, तर निखिल नवलू गंभीर जखमी झाला. रिक्षाचालक बाळकृष्ण खरात यांना किरकोळ दुखापत झाली.
घटनास्थळी स्थानिक ग्रामस्थांनी तात्काळ मदतकार्य सुरू करून जखमी नवलू याला उपचारासाठी हलवले. देवगड पोलिसांचे हवालदार गणपती गावडे व योगेश महाले यांनी मध्यरात्री घटनास्थळी भेट देऊन पाहणी केली. गुरुवारी सकाळी कणकवली उपजिल्हा रुग्णालयात विनायक पुजारे याच्या मृतदेहाचे शवविच्छेदन करून मृतदेह नातेवाईकांच्या ताब्यात देण्यात आला.
या घटनेची फिर्याद रिक्षाचालक बाळकृष्ण खरात यांनी देवगड पोलीस स्थानकात नोंदवली असून तपास सहाय्यक पोलीस निरीक्षक सुप्रिया बंगडे करीत आहेत. दरम्यान, विनायक पुजारे हा मोलमजुरी करून कुटुंबाचा उदरनिर्वाह करीत होता. त्याच्या पश्चात आई व दोन विवाहित बहिणी असा परिवार आहे.