मालवण ः पुढारी वृत्तसेवा
मालवण येथील राजकोट किल्ल्यावर उभारण्यात आलेला छत्रपती शिवाजी महाराजांचा पुतळा कोसळल्याप्रकरणी अटक करण्यात आलेला तिसरा संशयित परमेश्वर रामनरेश यादव (रा. मिर्झापूर, उत्तरप्रदेश) याची शनिवारी पोलिस कोठडी संपल्याने त्याला मालवण न्यायालयात हजर केले असता न्यायालयाने त्याला 25 ऑक्टोबरपर्यंत न्यायालयीन कोठडी सुनावली.
मालवणात साजर्या झालेल्या नौदल दिननिमित्त राजकोट किल्ल्यावर उभारण्यात आलेल्या छत्रपती शिवाजी महाराज यांच्या पुतळ्याचे 4 डिसेंबर 2023 रोजी अनावरण झाल्यावर अवघ्या आठ महिन्यानंतर 26 ऑगस्ट 2024 रोजी हा पुतळा कोसळला होता. या प्रकरणात सा. बां. अधिकार्यांनी दिलेल्या तक्रारीनुसार मालवण पोलिसांनी पुतळ्याचा शिल्पकार जयदीप आपटे व बांधकाम सल्लागार चेतन पाटील यांच्यावर गुन्हा दाखल करून दोघांनाही अटक केली. सध्या हे दोन्ही दोन्ही आरोपी न्यायालयीन कोठडीत आहेत. या प्रकरणात अधिक तपास करत असताना पोलिसांनी या पुतळ्याचे वेल्डिंग करणार्या परमेश्वर रामनरेश यादव या तिसर्या आरोपीला अटक करून न्यायालयात हजर केले असता त्यांना 19 ऑक्टोबरपर्यंत पोलिस कोठडी सुनावली होती. शनिवारी पोलिस कोठडी संपल्याने त्याला मालवण न्यायालयात हजर करण्यात आले.
कणकवलीचे पोलीस उपअधीक्षक घनश्याम आढाव यांनी सरकारी पक्षातर्फे बाजू मांडताना शिल्पकार जयदीप आपटे याने परमेश्वर यादव याला सब कॉन्ट्रॅक्ट दिले होते याचा तपास करणे, यादव याला कामाचे किती पैसे मिळाले, यादव याच्याकडे वेल्डिंग कामाचे शिक्षण घेतल्याचा डिप्लोमा सर्टिफिकेट आहे का याचा तपास करण्यासाठी आणखी चार दिवसांची पोलिस कोठडी देण्याची मागणी केली. तर संशयित यादव याच्यातर्फे अॅड. अक्षय सामंत यांनी बाजू मांडत पुतळ्याचे डिझाईन व कास्टिंगचे काम व उभारणीचे काम शिल्पकार जयदीप आपटे याच्या निगराणीखाली झाले असून परमेश्वर यादव याने त्याला नेमून दिलेले काम केले आहे, त्यामुळे पुतळ्याच्या कामास आपटे जबाबदार असल्याने यादव याच्यावर कारवाई होणे चुकीचे असल्याचे सांगितले. पोलिस अधिकारी आढाव यांनी पुतळ्यासाठी केलेले धातूचे जोडकाम हे कमकुवत आढळल्याने त्यांदृष्टीने तपास करताना वेल्डिंग करणार्या यादव याला अटक केली आहे.