सावंतवाडी : सावंतवाडी नगरपरिषदेवर शिवसेनचाच हक्क आहे, शहरातील राजकीय बलाबल पाहता, नगराध्यक्ष शिवसेनेचाच असावा, अशी आमची ठाम भूमिका आहे. महायुतीच्या बैठकीत हा विषय आपण मांडणार असून सावंतवाडी नगराध्यक्षपद शिवसेनेला सोडावे, अशी मागणी करणार असल्याचे सावंतवाडीचे आमदार दीपक केसरकर यांनी सांगितले.
आ. केसरकर म्हणाले, सावंतवाडी ही एकमेव नगरपरिषद आहे, जिथे यापूर्वी आरक्षण नसतानाही महिला नगराध्यक्षा राहिलेल्या आहेत. शिवसेनेत अनेक सक्षम उमेदवार असून महायुतीमध्ये जागावाटपाची बोलणी सुरू आहे. माजी नगराध्यक्ष संजू परब हे शिवसेनेसोबत आहेत. तसेच गेली अनेक वर्षे सावंतवाडी शहराचा पाठिंबा आम्हाला राहिला आहे. शहरात शिवसेनेचे प्राबल्य आहे. सहाजिकच नगराध्यक्ष पद शिवसेनेकडे असावे, यात काही वावगे नाही.
राज्यातील सर्वच नगरपरिषदांचे नगराध्यक्ष आरक्षण जाहीर झाले आहे. या पार्श्वभूमीवर जागा वाटपाबाबत लवकरच महायुतीची उच्चस्तरीय बैठक होणार आहे. त्या बैठकीत आपण सावंतवाडीचे नगराध्यक्षपद शिवसेनेसाठी मागणार असल्याचे आ. दीपक केसरकर यांनी सांगितले. जिल्हाप्रमुख संजू परब यावेळी उपस्थित होते.
नगराध्यक्ष आरक्षण जाहीर होताच आ. केसरकर यांनी सावंतवाडी नगराध्यक्षपदावर जाहीरपणे शिवसेनेचा हक्क सांगितल्याने महायुतीतील मुख्यपक्ष भाजप याबाबत काय भूमिका घेणार? याकडे सर्वांचे लक्ष लागले आहे.