मालवण : मालवण नगरपालिका निवडणुकीमध्ये भाजपकडून नगराध्यक्ष पद उमेदवारीच्या शर्यतीत असलेल्या माजी नगरसेविका पूजा करलकर यांनी रविवारी शिवसेना उद्धव बाळासाहेब ठाकरे पक्षात प्रवेश केला. उबाठा शिवसेनेकडून नगराध्यक्ष पदासाठी उमेदवार म्हणून पूजा करलकर यांची सर्वांनुमते निवड करण्यात आली आहे. पूजा करलकर यांच्या उबाठा शिवसेना प्रवेशामुळे भाजपला धक्का बसला आहे.
भाजपकडून मालवण नगराध्यक्ष पदाच्या उमेदवारांच्या शर्यतीत माजी नगरसेविका पूजा करलकर यांचे नाव चर्चेत होते. मात्र, सामाजिक कार्यकर्त्या शिल्पा खोत यांना भाजपाकडून नगराध्यक्ष पद उमेदवारी जाहीर झाली. यामुळे पूजा करलकर यांनी उबाठा शिवसेनेमध्ये प्रवेश केल्याची जोरदार चर्चा सुरू आहे. पूजा करलकर यांनी त्यांचे पती प्रमोद करलकर यांच्यासमवेत माजी आ. वैभव नाईक यांच्या प्रमुख उपस्थितीत उबाठा शिवसेनेत प्रवेश केला. पूजा करलकर यांना उबाठा शिवसेनेकडून नगराध्यक्ष पदाची उमेदवारी देखील देण्यात आली आहे. सोमवारी 17 नोव्हेंबर रोजी सकाळी 10 वाजता सौ. करलकर या नगराध्यक्ष पदासाठी उमेदवारी अर्ज दाखल करणार येणार आहे.