कुडाळ : पुढारी वृत्तसेवा : सिंधुदुर्ग जिल्ह्यासह कुडाळ तालुक्यातील अकरा दिवसांच्या बाप्पांचे मंगळवारी (दि. १७) भक्तिमय वातावरणात विसर्जन करण्यात आले. यावेळी गणपती बाप्पा मोरया... मंगलमूर्ती मोरया.... पुढच्या वर्षी लवकर या...असा बाप्पांचा जयघोष करण्यात आला. फटाक्यांच्या आतषबाजीत, ढोलताशांच्या गजरात मिरवणूक काढून बाप्पांना निरोप देण्यात आला.
मागील अकरा दिवस घरोघरी श्री गणेश मुर्तीचे पूजन करण्यात आले. आरती, भजने, फुगड्या व अन्य विविध कार्यक्रम पार पडले. कुडाळ, कणकवली, देवगड, दोडामार्ग, वैभववाडी, मालवण, वेंगुर्ले, सावंतवाडी, बांदा आदी सर्वत्र मंगळवारी सायंकाळी समुद्र, नदी, तलाव, ओहोळ आदी ठिकठिकाणी श्री गणेश मूर्तींचे विसर्जन करण्यात आले.