रत्नागिरी : जिल्ह्यातील धार्मिक स्थळे, रुग्णालये किंवा शैक्षणीक संस्था व सार्वजनिक ठिकाणाची जवळपास तात्पुरती पक्ष कार्यालये स्थापन करण्यावर निवडणूक प्रक्रिया पूर्ण होईपर्यंत (दि. 25 नोव्हेंबर 2024 पर्यंत) निर्बंध घालण्यात येत असल्याबाबतचे आदेश जिल्हादंडाधिकारी एम देवेंदर सिंह यांनी जारी केले आहेत.
भारत निवडणूक आयोगाने विधानसभा सार्वत्रिक निवडणूक 2024 साठीचा कार्यक्रम 15 ऑक्टोबर रोजी घोषित केला आहे. निवडणूक कार्यक्रम घोषित केल्याच्या दिनांकापासून आदर्श आचार संहिता अंमलात आलेली आहे. त्यामुळे जिल्ह्यातील विधानसभा निवडणुकीची संपूर्ण प्रक्रिया शांततेत, निर्भय व न्याय वातावरणात पार पाडण्याच्या द़ृष्टीकोनातून जिल्ह्यातील धार्मिक स्थळे, रुग्णालये किंवा शैक्षणिक संस्था व सार्वजनिक ठिकाणाचे जवळपास तात्पुरती पक्ष कार्यालये स्थापन करण्यावर भारतीय नागरिक सुरक्षा संहिता, 2023 चे कलम 163 अन्वये जिल्हादंडाधिकारी एम. देवेंदर सिंह यांना प्रदान करण्यात आलेल्या अधिकाराचा वापर करून त्यांनी निवडणूक प्रक्रिया पूर्ण होईपर्यंत (दि. 25 नोव्हेंबर 2024 पर्यंत) निर्बंध घालण्यात येत असल्याबाबतचे आदेश जारी केले आहेत. या आदेशाचे उल्लंघन केल्याचे आढळल्यास कारवाई केली जाणार आहे.