रत्नागिरीत २० नोव्हेंबरपर्यंत युवा महोत्सव 
रत्नागिरी

Youth Festival| रत्नागिरीत २० नोव्हेंबरपर्यंत युवा महोत्सव

विजेत्यांना नवी दिल्लीत राष्ट्रीय स्तरावर महाराष्ट्राचे प्रतिनिधित्व करण्याची संधी

पुढारी वृत्तसेवा

​रत्नागिरी : भारत सरकार युवा कार्यक्रम व खेळ मंत्रालय यांच्यामार्फत दरवर्षी आयोजित करण्यात येणाऱ्या राष्ट्रीय युवा महोत्सवाचे यंदा 'विकसित भारत यंग लीडर्स डायलॉग २०२७' मध्ये रूपांतर करण्यात आले आहे. या उपक्रमाच्या अनुषंगाने जिल्हा क्रीडा अधिकारी कार्यालय, रत्नागिरी यांच्यावतीने जिल्हास्तरीय युवा महोत्सवाचे भव्य आयोजन करण्यात येत आहे. जिल्ह्यातील १५ ते २९ वर्षे वयोगटातील जास्तीत जास्त युवक-युवतींनी आपले कलागुण सादर करण्यासाठी या महोत्सवात उत्स्फूर्तपणे सहभागी व्हावे, असे आवाहन जिल्हा प्रशासन आणि जिल्हा क्रीडा अधिकारी कार्यालयामार्फत करण्यात आले आहे.

​सांस्कृतिक ट्रॅक अंतर्गत होणाऱ्या सर्व स्पर्धांसाठी 'विकसित भारतासाठी नशामुक्त युवा' ही मध्यवर्ती संकल्पना निश्चित करण्यात आली आहे. तरुणाईमध्ये जनजागृती निर्माण करण्यासोबतच त्यांच्यातील सुप्त कलागुणांना हक्काचे व्यासपीठ मिळवून देणे हा यामागील मुख्य उद्देश आहे. या सांस्कृतिक ट्रॅक अंतर्गत पाच प्रमुख कलाप्रकारांचा समावेश करण्यात आला असून, यामध्ये १० सदस्यांच्या संघासाठी समूह लोकनृत्य, समूह लोकगीत आणि पथनाट्य या सांघिक स्पर्धांचे आयोजन केले आहे. यासोबतच वैयक्तिक सहभागासाठी चित्रकला स्पर्धा आणि कविता लेखन या दोन स्पर्धांचाही यात समावेश आहे.

या स्पर्धेची रचना अतिशय स्पर्धात्मक आणि महत्त्वाकांक्षी असून, जिल्हास्तरावर प्रथम आणि द्वितीय क्रमांक पटकावणाऱ्या विजेत्या कलाकारांची व संघांची निवड पुढील विभागस्तरीय स्पर्धेसाठी केली जाणार आहे. विभागस्तरावरून राज्यस्तरावर मजल मारणाऱ्या आणि तेथून निवड होणाऱ्या सर्वोत्कृष्ट संघांना थेट जानेवारी २०२७ मध्ये देशाची राजधानी नवी दिल्ली येथे होणाऱ्या राष्ट्रीय युवा महोत्सवात महाराष्ट्राचे प्रतिनिधित्व करण्याची ऐतिहासिक संधी प्राप्त होणार आहे. रत्नागिरी जिल्ह्यातील तरुणांना राष्ट्रीय स्तरावर आपली कला आणि संस्कृती सादर करण्याचे हे एक उत्तम व्यासपीठ ठरले आहे.

या महोत्सवात सहभागी होण्यासाठी इच्छुक स्पर्धक आणि संघांनी आपले प्रवेश अर्ज आवश्यक कागदपत्रांसह येत्या २० नोव्हेंबर २०२६ पर्यंत सादर करणे आवश्यक आहे. स्पर्धक आपले अर्ज रत्नागिरी एम.आय.डी.सी. मिरजोळे येथील जिल्हा क्रीडा अधिकारी कार्यालयात समक्ष जाऊन सादर करू शकतात. तसेच, प्रशासनाने उपलब्ध करून दिलेल्या ऑनलाईन गुगल फॉर्मच्या लिंकद्वारे किंवा संबंधित क्यूआर कोड स्कॅन करून घरबसल्या देखील अर्ज करण्याची सुविधा उपलब्ध करून देण्यात आली आहे. या स्पर्धेसंदर्भात अधिक माहिती किंवा मार्गदर्शनासाठी क्रीडा अधिकारी गणेश जगताप यांच्याशी ९१८३२९०३५०९७ या भ्रमणध्वनी क्रमांकावर संपर्क साधावा, असे कळवण्यात आले आहे.

लोकल ते ग्लोबल बातम्यांसाठी डाऊनलोड करा दैनिक पुढारीचे Android आणि iOS मोबाईल App.

'Pudhari' is excited to announce the relaunch of its Android and iOS apps. Stay updated with the latest news at your fingertips.

Android and iOS Download now and stay updated, anytime, anywhere.

SCROLL FOR NEXT