दापोली : दापोली तालुक्यातील मुगीज-कलमपेट येथे बंद घराचे कुलूप व कोयंडा तोडून अज्ञात चोरट्याने घरात प्रवेश करत सुमारे ८ लाख रुपयांचे सोन्याचे दागिने लंपास केल्याची घटना उघडकीस आली आहे. याप्रकरणी दापोली पोलिस ठाण्यात अज्ञात चोरट्याविरोधात घरफोडीचा गुन्हा दाखल करण्यात आला आहे.
ही घटना ३१ ऑगस्ट रोजी रात्री ८.३० वाजल्यापासून १ सप्टेंबर रोजी सकाळी ६.३० वाजण्याच्या दरम्यान घडली. फिर्यादी पांडुरंग भिकू झाटे यांच्या बंद घराच्या पुढील दरवाजाचे कुलूप व कोयंडा तोडून चोरट्याने घरात प्रवेश केला. तसेच लगतच्या भिंतीतील स्लायडिंग खिडकी सरकवून घरातील खोलीत प्रवेश केला. घरातील लोखंडी कपाट उचकटवून त्यातील लॉकरमध्ये ठेवलेले सोन्याचे दागिने चोरट्याने चोरून नेले.