लांजा : तालुक्याला मुसळधार वादळी पावसाने चांगलेच झोडपले. तालुक्यातील आसगे मांडवकरवाडी येथे उभ्या असलेल्या कारवर झाड पडून नुकसान झाल्याची घटना सोमवारी सकाळी घडली. यासह तालुक्यात काही ठिकाणी पडझडीच्या घटना घडल्या.
लांजा तालुक्यामद्ये पाच दिवसांपासून मुसळधार वादळी पाऊस पडतो आहे. सोमवारी सकाळी आसगे मांडवकरवाडी दत्त मंदिर येथे पार्किंग केलेल्या कारवर वडाचे झाड पडल्याने कारचे नुकसान झाल्याची घटना घडली, तर व्हेळ पाचल या मार्गावर सोमवार सकाळी झाड पडल्याने वाहतूक काही काळ खंडित झाली होती. ग्रामस्थांच्या मदतीने हे झाड तोडून बाजूला करण्यात आले. पावसामुळे पन्हळे कुडकरवाडी येथे संरक्षक भिंत कोसळली. मात्र, या घटनेत कोणीही जखमी झाले नाही. याबरोबरच चाफेट येथे मंगला गुणे यांच्या घरावर फणसाची फांदी पडल्याने त्यांच्या घराच्या पडवीचे सिमेंट पत्रे फुटून नुकसान झाले.