देवरुख : शहरातील नगर पंचायतीच्या उपनगराध्यक्ष व दोन स्वीकृत नगरसेवकांची निवड 15 जानेवारी रोजी होणार्या नगर पंचायतीच्या बैठकीमध्ये केली जाणार आहे. उपनगराध्यक्षपदी शिंदे गटाचे नगरसेवक वैभव पवार, तर स्वीकृत नगरसेवक म्हणून भाजपकडून रुपेश भागवत व शिंदे शिवसेना व मनसे गटाकडून सागर संसारे यांचे नाव निश्चित करण्यात आले आहे.
बुधवारी नगर पंचायतीची बैठक आयोजित करण्यात आली होती. मात्र, मकर संक्रांत व मार्लेश्वर यात्रा असल्याने ही विशेष बैठक गुरुवारी निश्चित करण्यात आली. या बैठकीमध्येच उपनगराध्यक्ष व स्वीकृत नगरसेवक यांच्या निवडीचा कार्यक्रम जाहीर करण्यात आला आहे.
नगर पंचायतीवर भाजप महायुतीने निर्विवाद सत्ता काबीज केली. यात भाजपाचे चार नगरसेवक व शिंदे गटाचे तीन नगरसेवक असा सात नगरसेविकांचा गट करण्यात आला. या पूर्वीच भाजपच्या नगराध्यक्षा मृणाल शेट्ये थेट जनतेतून निवडून आल्या आहेत. यामुळे भाजपा प्रणित गटाला उपनगराध्यक्षपददेखील देण्यात आले. हे पद शिंदे गटाचे अनुभवी नगरसेवक वैभव पवार यांना देण्याचे युतीकडून निश्चित करण्यात आले, तर भाजपाला स्वीकृत नगरसेवक देण्याचे युतीतून ठरवण्यात आले. यानुसार खालची आळी येथील भाजपाचे सक्रिय कार्यकर्ते रुपेश भागवत यांचे स्वीकृत नगरसेवक म्हणून नाव भाजपाकडून निश्चित करण्यात आले, तर दुसरा स्वीकृत नगरसेवक म्हणून राष्ट्रवादी अजित पवार पक्ष चार नगरसेवक यांच्याबरोबर मनसेचे तीन नगरसेवक असा गट तयार करण्यात आला.
या गटाचे सर्वेसर्वा म्हणून स्थानिक आमदार शेखर निकम हे मार्गदर्शक आहेत. निकम यांनी त्यांच्या गटाचा म्हणून मनसेचे कार्यकर्ते सागर संसारे यांचे स्वीकृत नगरसेवक म्हणून नाव निश्चित केले आहे. उपनगराध्यक्ष व दोन स्वीकृत नगरसेवक यांची अधिकृत निवड गुरुवारी सकाळी होणार्या नगर पंचायतीच्या बैठकीत होणार आहे.