रत्नागिरी ः भरधाव एसटीची समोरून धडक बसून एसटीच्या मागील चाकांखाली सापडून गंभीर जखमी झालेल्या वृद्धाचा मृत्यू झाला. अपघाताची ही घटना मंगळवार, 13 मे रोजी सकाळी 11.30 वा. सुमारास येथील एसटी आगारात घडली. या प्रकरणी एसटी चालक बापू कोंड्या आखाडे (55, रा. जाकादेवी, रत्नागिरी) विरोधात शहर पोलिस ठाण्यात गुन्हा दाखल करण्यात आला आहे.
कमलाकर बाबाजी चव्हाण (82, रा. जुवे चव्हाणवाडी, रत्नागिरी) असे एसटीच्या चाकाखाली सापडून मृत्यू झालेल्या वृद्धाचे नाव आहे. याबाबत त्यांचा मुलगा शैलेंद्र कमलाकर चव्हाण (50) यांनी शहर पोलिस ठाण्यात तक्रार दिली आहे. त्यानुसार, मंगळवारी दुपारी त्यांचे वडील कमलाकर चव्हाण हे मेडिकलमधून आपल्या गोळ्या घेऊन घरी जाण्यासाठी एसटी डेपोत जात होते. त्यावेळी जयस्तंभ ते एसटी डेपो येणार्या भरधाव एसटीने (एमएच-14-बीटी-2757) एसटी डेपो बाहेरच कमलाकर चव्हाण यांना समोरून ठोकर दिली.
एसटीच्या जोरदार धडकेमुळे कमलाकर चव्हाण खाली पडले व मागील चाकांखाली आले. त्यांच्या दोन्ही चाके पायांवरून गेल्याने ते गंभीर जखमी झाले. आजुबाजूच्या नागरिकांनी त्यांना तातडीने जिल्हा शासकीय रुग्णालयात दाखल केले; परंतु उपचारादरम्यानच त्यांचा मृत्यू झाला. एसटीची चाके त्यांच्या दोन्ही पायांवरून गेल्याने एसटी डेपो बाहेरच रक्ता-मांसाचा सडा पडला होता. अपघाताची माहिती मिळताच शहर पोलिसांनी घटनास्थळी धाव घेत अपघाताचा पंचनामा केला.