देवरुख : शहरानजीकच्या एका गावातील अल्पवयीन मुलीला लग्नाचे आमिष दाखवून पळवून नेणाऱ्या कोल्हापूर जिल्ह्यातील तरुणास देवरुख पोलिसांनी आंबा येथून मंगळवारी अटक केली आहे. गणेश आनंदा जाधव (वय २४ रा. केर्ले, ता. शाहूवाडी, जि. कोल्हापूर) असे अटक केलेल्या तरुणाचे नाव आहे.
याबाबत देवरुख पोलिस ठाण्यातून मिळालेल्या माहितीनुसार, देवरुख नजीकच्या एका गावातील अल्पवयीन मुलीची व गणेश जाधव या तरुणाची देवरुख बसस्थानक येथे भेट झाली होती. यानंतर ३० नोव्हेंबर रोजी सकाळी १० वाजण्याच्या सुमारास त्याने तिला लग्नाचे आमिष दाखवून पळवून नेले. आपली मुलगी सायंकाळपर्यंत घरी न आल्याने तिला अज्ञाताने पळवून नेल्याची तक्रार मुलीच्या वडिलांनी देवरुख पोलिस ठाण्यात दिली. या तक्रारीनुसार पोलिसांनी अज्ञाताविरोधात तक्रार दाखल करून त्याचा शोध घेण्यास सुरुवात केली.
पोलिसांनी माहिती घेतली असता, त्याचे नाव गणेश जाधव असल्याचे समजले. पोलिस त्याचा शोध घेत होते. मात्र त्याचा थांगपत्ता लागत नव्हता. अखेर तो आंबा येथे असल्याची गोपनीय माहिती मिळताच, देवरुख पोलिस निरीक्षक अतुल जाधव यांनी आपले सहकारी
पोलिस उपनिरीक्षक नामदेव जाधव, हे. कॉ. प्रशांत मसुरकर, हे. कॉ. सागर मुरुडकर, हे. कॉ. सचिन पवार, पो. हवालदार अभिषेक वेलवणकर यांना मंगळवारी सकाळी १० वा. घेऊन आंबा गाठले.
यावेळी गणेश हा या मुलीसोबत एका पडक्या घरात असल्याचे दिसून आले. यानंतर पोलिसांनी दोघांनाही ताब्यात घेऊन देवरुख येथे आणले व मुलीला घरच्यांच्या ताब्यात दिले. गणेश जाधव याला अटक केली. त्याला न्यायालयात हजर केले असता ९ डिसेंबरपर्यंत पोलिस कोठडी सुनावण्यात आली आहे. अधिक तपास पोलिस निरीक्षक अतुल जाधव करीत आहेत.