रत्नागिरी : रत्नागिरीचे मध्यवर्ती बसस्थानक कार्यान्वित झाल्यानंतर शहर बससेवेचे चिंचेखालचे स्टॅण्ड इतिहासजमा झाले आहे. आता या बसस्थानकाच्या शेडमध्ये प्रवासी थांबत नाहीत. मात्र काही चकाट्या मारणार्यांना या जुन्या बस शेडचा आधार राहिला आहे. आता येथील शहरी बससेवा नवीन स्थानकातून तर जिल्हाबाहेर जाणार्या एसटी दुसर्या बाजूला असलेल्या नव्या स्थानकातून जावू लागल्या आहेत. त्यामुळे चिंचेखालच्या बसस्टॉप जवळची प्रवाशी वर्दळ पूर्णपणे थंडावली आहे.
रत्नागिरीतील मध्यवर्ती बसस्थानकाच्या शेडमधून जिल्ह्याबाहेर जाणार्या एसटी थांबत होत्या. त्यावेळी स्थानकाच्या प्रवेश द्वाराजवळ असणार्या भल्यामोठ्या चिंचेच्या झाडाजवळ शहर बस सेवेची शेड होती. या शेडला चिंचेखालचा स्टॉप अशी ओळख निर्माण झाली होती. कालांतराने बसस्थानकाच्या आवारात मोकळ्या फलाटांचे बसस्थानक सुरू झाले. त्यावेळी जुन्या शेडमधून ज्या ठिकाणाहून जिल्ह्याबाहेरच्या एसटी थांबत होत्या त्याठिकाणी शहर सेवेच्या काही बस सुरू झाल्या. त्यानंतर चिंचेखालच्या स्टॉपवरून मिरकरवाडा, काळबादेवी, मिर्या बंदर अशा शहराच्या खालच्या भागात जाणार्या एसटी चिंचेखालच्या स्टॉपवरून सुटत होत्या. त्यामुळे या परिसरात प्रवाशांची मोठी वर्दळ होती. परंतु आता शहरी आणि ग्रामीणसह जिल्ह्याबाहेर जाणार्या एसटी नवीन बसस्थानकातून सुटू लागल्या आहेत. त्यामुळे चिंचेखालच्या स्टॉपजवळील गर्दी होणे बंद झाले आहे. या स्टॉपवर पूर्णपणे शुकशुकाट असतो. त्यामुळे गप्पा किंवा चकाट्या मारणार्यांना येथील शेड आधार झाल्या आहेत.