Afia Palekar Chairperson Khed Panchayat Samiti
खेड : खेड पंचायत समितीच्या सभापती व उपसभापती पदाची निवड सोमवारी (दि. ९) उपविभागीय अधिकारी तथा पीठासन अधिकारी वैशाली पाटील यांच्या अध्यक्षतेखाली पार पडली. या निवडणुकीत शिवसेनेच्या आफिया पालेकर यांची सभापतीपदी, तर सुनील मोरे यांची उपसभापतीपदी बिनविरोध निवड करण्यात आली.
खेड पंचायत समितीत शिवसेनेचे स्पष्ट बहुमत असल्याने सभापतीपदासाठी अंजनी गणातून निवडून आलेल्या आफिया पालेकर यांच्या नावावर शिक्कामोर्तब करण्यात आले. त्यांच्या निवडीमुळे मुस्लिम समाजाला पुन्हा एकदा पंचायत समितीच्या नेतृत्वात प्रतिनिधित्वाची संधी मिळाली आहे. यापूर्वीही या समाजातील सदस्याला सभापतीपदाची संधी मिळाली होती.
उपसभापती पदासाठी गुणदे गणातून निवडून आलेले सुनील मोरे यांच्या नावाची सुरुवातीपासूनच चर्चा होती. अखेर सर्वांच्या एकमताने त्यांच्या नावावर शिक्कामोर्तब झाल्याने त्यांची उपसभापतीपदी निवड निश्चित झाली.
खेड पंचायत समितीत शिवसेनेचे १०, ठाकरे गटाचे ३ आणि राष्ट्रवादी काँग्रेसचा १ सदस्य असे पक्षीय बलाबल आहे. त्यामुळे सभापतीपद शिवसेनेकडे जाणार हे पूर्वीपासूनच स्पष्ट झाले होते. शिवसेना नेते रामदास कदम तसेच गृहमंत्री योगेश कदम यांच्या मार्गदर्शनाखाली ही निवड प्रक्रिया पार पडल्याचे सांगितले जाते.
दरम्यान, आफिया पालेकर यांच्या निवडीमुळे मुस्लिम समाजात समाधान व्यक्त करण्यात येत आहे. पंचायत समितीच्या कारभारात सर्व घटकांना सोबत घेऊन काम करण्याचा प्रयत्न करणार असल्याचा विश्वास त्यांनी व्यक्त केला.
निवडीनंतर जिल्हा परिषद सदस्य अरुण कदम, तालुका प्रमुख सचिन धाडवे, उद्योजक शैलेश कदम, पंचायत समिती सदस्य संग्राम कदम, दिलीप डेरवनकर, निसार सुर्वे, शमिका म्हादे, प्रशांत चव्हाण, नम्रता तांबट, महेंद्र भोसले, सुनीता कासार आदींसह अनेक पदाधिकारी उपस्थित होते.
निवडीनंतर नवनिर्वाचित सभापती व उपसभापती यांची रथातून खेड शहरात सवाद्य भव्य मिरवणूक काढण्यात आली. शुभेच्छा देण्यासाठी नागरिकांनी मोठी गर्दी केली होती.