चिपळूण शहर : पुढारी वृत्तसेवा : शहरालगत असलेल्या धामणवणे येथील शेत तळ्यामध्ये पडलेल्या खवले मांजरास वनविभागाने जीवदान दिले आहे. याबाबत माहिती राम रेडीज यांनी दूरध्वनीद्वारे वन विभागाला दिली. यानंतर खवले मांजराचे रेस्क्यू करण्यासाठी वन विभागाच्या वन्यप्राणी बचाव पथकाने तत्काळ घटनास्थळी धाव घेतली. या खवले मांजरास वनविभागाच्या कर्मचार्यांमार्फत सुरक्षितरीत्या ताब्यात घेऊन पशुवैद्यकीय अधिकारी यांच्याकडून तपासणी करण्यात आली. यानंतर त्याला नैसर्गिक अधिवासात सुखरूप सोडून देण्यात आले.
विभागीय वन अधिकारी दीपक खाडे, सहायक वनसंरक्षक सचिन निलख यांच्या मार्गदर्शनाखाली व परीक्षेत्र वन अधिकारी राजश्री कीर, वनरक्षक शिंदे, राहूल गुंठे व नंदकुमार कदम यांनी या प्रक्रियेत सहभाग घेतला. मानवी वस्तीमध्ये किंवा संकटात सापडलेले वन्यप्राणी आढळल्यास याबाबत तत्काळ माहिती देण्याकरिता वनविभागाच्या टोल फ्री क्रमांकावर संपर्क साधण्याचे आवाहन वनविभागामार्फत करण्यात आले आहे.